سلسلة وجهة نظر

وجهة نظر 3

عارفة عارفة هتقولولى كنتى فين مكناش عارفين نعيش منغير وجهات نظرك (متواضعة صح) , علشان كده قلت الحقكوا بكام وجهة نظر كده على الماشى , بس صلوا على النبى الاول (عليه افضل الصلاة والسلام)0

يتقنعنى يقنعك

هات وخد كده يعنى , مش عارفة ليه المبدا ده مبقاش موجود دلوقتى , بقى كله يقنعك يقنعك , وتيجى تكلم واحد فى اى حاجة تحس انه بيملى عليك قراراته وماشى , مش ينفع يسمعك ولو تكرم وسمعك يبقى ودن من طين وودن من طين برده

يعنى مثلا لو اتنين بيتناقشوا , واحد يقولك انا شايف كذا والتانى شايف كذا , وفجاة تلاقى لا انت مش شايف كويس والتانى لا انت مبتشوفش اصلا , وقوم يلا يا حمار من هنا , وفى الاخر يمشوا وكل واحد متمسك برايه , مش عارفة ليه مع انه لازم يكون راى واحد فيهم صح , ولو الاتنين صح يبقى ليه منقولش (خلاص نطلع من الرايين براى وسط وبكده نبقى متفقين )0

وليه مبنقولش العبارات ده كتير فى حياتنا
لا عندك حق فى النقطة ده وباقى النقط هعيد تفكير فيها

ايوة انا كنت بفكر من زاوية تانية

ايوة صح انت رايك سليم
خلاص انا مقتنع برايك
شيك هاند

حساسة

لما تيجى تكلم واحدة وتقولها كلمة معينة تروح معيطة , أو واحدة واجهت موقف معين سخيف ادام زميلاتها أو ادام اى حد تلاقيها مضايقة جدا وزعلانة , ويقولولك أصلها حساسة اوى , برده الكلمة ده سعات بحس انها مش فى موضعها , مش معنى ان انا حساسة ان كل حاجة تزعلنى وان أى موقف يضايقنى وان الناس تبقى بتعاملنى بالورقة والقلم , انا ممكن اسمى ده ضعف او عدم ثقة بالنفس , اه الانسان الحساس ممكن يضايق او يتكسف او يتحرج بسرعة من موقف معين بس مش للدرجه دى يعنى

من الاخر كده انا شايفة ان الانسان الحساس ده الانسان اللى مبيحبش يجرح حد ولو

شاف حد فى ظرف سيئة او حد محتاج او حد فقير مثلا او شاف حد بيتعرض لموقف محرج , بيبقى مضايق اوى وزعلان ولو حساس اوى زى واحدة اعرفها كده! يحس ان هو السبب حتى لو هو ملوش دعوة باللى حصل , وممكن الموقف ده ياثر فيه جدا
يعنى بيضايق لغيره لانه حساس مش بيضايق لنفسه

الخوف

انواع كتيييييير , فى منها الكويس زى الخوف من النار او الخوف من ربنا , وفى منها الوحش زى الخوف من بكره والخوف من الناس والخوف من الغلط المسموح بيه , وده نوع منتشر جدا عندنا فى الكليات وخاصة عند البنات , تلاقى الواحدة خايفة لاحسن تكلم او تسال الدكتور عن حاجة وكانها لو سالته هياكلها , واحيانا لو المعيد طلب من واحدة انها تحل حاجة على السبورة تلاقى اجابات غريبة, والله تحس انها بتدل على الاعاقة زى مثلا انا عارفة الاجابة بس مش هعرف اقولها , طيب اشرحى اللى عارفاه وخلاص بأى طريقة , او مثلا انا مبعرفش اشرح , انا مبعرفش احل على السبورة , انا هقولك وحضرتك اشرح , او محدش هيسمعنى

ويسلام بقى لو الدوكتور سال سؤال تلاقى خمس تخمس اللى قاعدين عارفين الاجابة , بس خايفين يرفعوا ايديهم لاحسن الاجابة تطلع غلط , وتحس انك قاعد فى بيت الرعب مش محاضرة , وناس تقولك مهو الدكتور هيتريىء عليه والعيال هيضحكوا عليه, انا مش شايفة انها حاجة خطيرة يعنى لو حصل كده ده مش ينقص منك ده يدل على تفاهتهم هما وعادى يعنى ده نقاش لازم يكون فيه رد فعل

على فكرة انا ليا صحاب كتيييييييييير بحبهم جدا من النوع اللى بيخاف ده واختى الصغيرة كده برده , بس انا مبحبش الموضوع ده ونفسى يتغير

ملحوظة

ده مجرد وجهات نظر قد تكون صحيحة وقد تكون خاطئة وقد تكون لا صحيحة ولا خاطئة , وممكن تختلف من شخص لاخر

وجهات النظر دى لا تعنى ان انا البت الفتكة يعنى وخلاص بعمل بكل ده لا بس انا بحاول على اد مقدر اعمله وبطبقه فعلا

اللهم اجعلنى ممن يقولون القول فيتبعون احسنه ولا تجعلنى ممن يقولون ما لا يفعلون

والسلام عليكم ورحمة الله وبركاته

سلسلة وجهة نظر

وجهة نظر 2

الحب مش لازم ينتهى بالجواز , والجواز مش لازم يبتدى بالحب

يعنى ممكن تحبى واحد لانه فى حاجات كتير كويسة بس مثلا تلاقيه مش بيصلى , او بيصلى فرض ويسيب أربعة اهو ده مينفعش للجواز مثلا , وممكن تحب واحدة لانها محترمة ومتدينة وبنت ناس وكده بس لما تعرفها اكتر تلاقيها مبتعرفش تتعامل مع الناس او اى حاجة تانية والعكس مش لازم الجواز يبتدى بحب , بس لازم يبتدى بقبول متبادل بين الطرفين , يعنى لو واحد لقى واحدة فيها صفات كتير كويسة وتصلح لاقامة بيت مسلم سعيد ,فممكن الحب ييجى بعد كده من خلال عشرتهم وتصرفاتهم , بس برده ممكن الحب ينتهى بالجواز وممكن الجواز يبتدى بالحب..كل شىء ممكن

الكورة

سعات بسمع واحد بيقول لصاحبه يا عم انا مبحبش الكورة ومبتفرجش على ماتشات, وكأن ده حاجة يفخر بيها وانه كده مميز , هو اه ده حرية شخصية ولو واحد مبيحبهاش ده بمزاجه , بس انا شايفة انها مش حاجة مميزة يعنى انه ميحبش الكورة لان طبيعة الراجل انه يحب الكورة ويتابعها ويحب الرياضة عامة , وده مش بينقص منه ,بالعكس لو هو رياضى كمان فى تفكيره ومش متعصب ده شىء جميل

الرقة

صفة جميلة اوى , بس مش عارفة ليه حاسة انها بتستخدم فى غير موضعها, يعنى مثلا تلاقى واحدة مبتعرفش تروح السوق ولا تغسل فرخة ولا تقشر سمك, او واحدة بطيئة اوى أو مش مدردحة كده وفاهمة الدنيا كويس وبتعرف تتصرف , فيقولولك عليها اصلها رقيقة, ايه الرقة فى كده مش فاهمة, انا عن نفسى بسميها خيبة , سورى يعنى يا بنات بس انا فى رايى ان الرقة ده صفة ممكن يتسم بيها الراجل والست , ويبقى مفهومها رقة فى المشاعر والاحاسيس وكده

الحب من اول نظرة

مفيش حاجة اسمها حب من أول نظرة , اه ممكن يكون فى اعجاب من اول نظرة بس مش حب , لان حب ده معناه انك عرفت اللى ادامك كويس( اخلاقه - شخصيته - تفكيره - دينه - عيوبه ومميزاته و00) فحبيته بعد معرفته , لكن مفيش حاجة اسمها حب من اول نظرة بتاع الافلام ده , ولا بتاع اغنية بعتلى نظرة بعتله وانغام وكلام من ده , الحب اكبر من انه بييجى والا فتاكد انه برده ممكن اوى ينتهى بنظرة..ولا ايه

سلسلة وجهة نظر

وجهة نظر 1

انا فى تلات انواع من العواطف او بمعنى اصح تلات علاقات بستغرب منهم اوى وبيحتاجوا منى وقفة كتير اوى فى حياتى وكان ليه فيهم وجهة نظر حبيت اتكلم عنها

اولا علاقة الله بعباده : علاقة غريبة جدا جدا , خالق الاكوان ومالك الارض والسماوات الجبار الغنى بيحب عباده وبيهديهم وبيغفر لهم وبيعطيهم وبيودهم منغير مياخد منهم اى حاجة ومنغير ميحتاج منهم حاجة (لا فلوس ولا نساء ولا قرابين ولا...) حتى الصلاة والدعاء دول لينا احنا مش لله عز وجل وبيفيدونا احنا, لما بيأمر بدفع فلوس صدقة او تكفير ذنوب او غيره يامرنا نعطيها للفقراء والمساكين و... مش لربنا

حب ربنا لعباده موضع كان محيرنى جدا, يعنى سعات اقول طيب ليه يا ربنا تعمل معانا كده مهو لو غلطنا عذبنا فى جهنم وخلاص , ليه تغفر لنا وتتوب علينا وتدخلنا الجنة وترحمنا وتلطف بينا , وكان الرد اللى رديته على نفسى كما قال عز وجل لاحد المتسائلين برده فى هذا الشان (لو خلقتهم لرحمتهم) , فعلا لا اله الا الله

ثانيا علاقة الام بأولادها: بجد والله يمكن انا مش ام بس بستغرب جدا من الحب الشديد من الام لاولادها , لما بتجرى عليه لو وقع , ولما تفتحله حضنها لو رجع , ولما تشبع لو شبع , ولما ترضى لو رضى , ولما بتفرح لو فرح ولما بتحزن لو حزن , ولما بتغضب لو غضب

فعلا عاطفة غريبة , والغريب اكتر انه مهما يجحد او عصاها برده مبتكرهوش , ربنا يخليكى يا امى

ثالثا علاقة الزوجين: لما بيكونوا بيحبوا بعض طبعا , مش لما بيكون كل واحد مستنى للتانى على غلطة , ده مش بتبقى جوازة ده بتبقى(جنازة)ا

بس فعلا لما يبقى الزوج والزوجة بيحبوا بعض حتى لو واجهوا مشاكل كتير فى حياتهم , برده الحياة بينهم بتبقى جميلة جدا, وتحس انهم كيان واحد , وكل واحد بيحاول يسعد التانى

المهم انا كان ليا استنتاج كده من الموضوع ده , انه ممكن يكون السبب ان فى العلاقات التلاتة فى اختلاط بين الطرفين شديد جدا سواء

بالروح : لان ربنا نفخ فينا من روحه فاحنا من روح الله وعلشان كده ربنا كرمنا واعزنا وبيرحمنا

او بالدم: لان الابن ده كان جنين بيتغذى من دم امه فهو اصبح جزء منها لانه من دمها

او بالجسد : فالعلاقة الزوجية بين الزوج والزوجة اثناء الزواج بتجعل منهم شخص واحد , لان كل واحد فيهم بيصبح مراة للتانى (معنوية و ظاهرية وفكرية ومادية وكل حاجة )ا

ويمكن ده اللى مبيخليش علاقات تانية زى الصداقة والزمالة والجيرة والقرابة تكون لها نفس العظمة ده والسمو ده بالرغم من قوتها

ده رايى حبيت اتكلم عنه , قد يحتمل الصواب والخطا , قد يكون معروفا او مجهولا , قد يكون تافها او ذات قيمة , المهم اننا استنتجته بتفكيرى وعبرت عنه

المهم انتوا رايكوا ايه؟