وجهة نظر 2
الحب مش لازم ينتهى بالجواز , والجواز مش لازم يبتدى بالحب
يعنى ممكن تحبى واحد لانه فى حاجات كتير كويسة بس مثلا تلاقيه مش بيصلى , او بيصلى فرض ويسيب أربعة اهو ده مينفعش للجواز مثلا , وممكن تحب واحدة لانها محترمة ومتدينة وبنت ناس وكده بس لما تعرفها اكتر تلاقيها مبتعرفش تتعامل مع الناس او اى حاجة تانية والعكس مش لازم الجواز يبتدى بحب , بس لازم يبتدى بقبول متبادل بين الطرفين , يعنى لو واحد لقى واحدة فيها صفات كتير كويسة وتصلح لاقامة بيت مسلم سعيد ,فممكن الحب ييجى بعد كده من خلال عشرتهم وتصرفاتهم , بس برده ممكن الحب ينتهى بالجواز وممكن الجواز يبتدى بالحب..كل شىء ممكن
الكورة
سعات بسمع واحد بيقول لصاحبه يا عم انا مبحبش الكورة ومبتفرجش على ماتشات, وكأن ده حاجة يفخر بيها وانه كده مميز , هو اه ده حرية شخصية ولو واحد مبيحبهاش ده بمزاجه , بس انا شايفة انها مش حاجة مميزة يعنى انه ميحبش الكورة لان طبيعة الراجل انه يحب الكورة ويتابعها ويحب الرياضة عامة , وده مش بينقص منه ,بالعكس لو هو رياضى كمان فى تفكيره ومش متعصب ده شىء جميل
الرقة
صفة جميلة اوى , بس مش عارفة ليه حاسة انها بتستخدم فى غير موضعها, يعنى مثلا تلاقى واحدة مبتعرفش تروح السوق ولا تغسل فرخة ولا تقشر سمك, او واحدة بطيئة اوى أو مش مدردحة كده وفاهمة الدنيا كويس وبتعرف تتصرف , فيقولولك عليها اصلها رقيقة, ايه الرقة فى كده مش فاهمة, انا عن نفسى بسميها خيبة , سورى يعنى يا بنات بس انا فى رايى ان الرقة ده صفة ممكن يتسم بيها الراجل والست , ويبقى مفهومها رقة فى المشاعر والاحاسيس وكده
الحب من اول نظرة
مفيش حاجة اسمها حب من أول نظرة , اه ممكن يكون فى اعجاب من اول نظرة بس مش حب , لان حب ده معناه انك عرفت اللى ادامك كويس( اخلاقه - شخصيته - تفكيره - دينه - عيوبه ومميزاته و00) فحبيته بعد معرفته , لكن مفيش حاجة اسمها حب من اول نظرة بتاع الافلام ده , ولا بتاع اغنية بعتلى نظرة بعتله وانغام وكلام من ده , الحب اكبر من انه بييجى والا فتاكد انه برده ممكن اوى ينتهى بنظرة..ولا ايه
11 comments:
الكورة
اختلف معاكي ف وجهة نظرك ف النقطة دي
اولا طبعا الرياضة حاجة جميلة ولازم الواحد يكون مهتم بنفسه رياضيا لأن دي ظاهرة صحية
لكن مع احترامي ليكي الكورة اللي بنشوفها النهاردة حاجة لا تمت للرياضة بصلة
ده حتى الروح الرياضية اللي مفروض انها تكون موجودة عند المشجعين للأسف نادر جدا لما تلاقيها
اللي بيحصل النهاردة ويسموه كورة ده
دي تعتبر صناعة مش اكتر ولا اقل
وانا واحد من الناس افتخر اني مبتابعش الكورة
:)
وبالتحديد الكورة المصرية
--------
الرقة
اتفق معاكي تماما في وجهة نظرك
بس خلي بالك احيانا لما يتقال لفظ رقيقة على واحدة ملهاش في شغل البيت
غاليبا مش بيكون مدح فيها يعني
وبتكون من باب السخرية لأن اكيد البنت اللي ملهاش ف شغل البيت دي حد مسكين وهتتعب كتير في حياتها
تحيتي وتقديري
:)
السلام عليكم
البوست النهارده دسم جداً وعايز كباية شاي كده علشان نعرف نعلق بمزاج
أولا الحب والجواز
انا متفق معاكي في رأيك في الموضوع دا بنسبة ميه في الميه
العلاقات الإنسانيه بصفه عامة لا يمكن تحديدها بقانون لأنها بتختلف من شخص لآخر على حسب حاجات كتير وزي ما وضحتي ممكن يحصل الحب وتكون فيه عوائق أخرى وكذلك ممكن يحصل الإرتباط ومايحصلش الحب
بالنسبة للكورة
طبعاً من مميزات أي شخص سواء واحد أو واحده إنه يكون رياضي
بس تعريف كلمة رياضي مش إنه بيشجع فريق كوره
رياضي يعني بيمارس الرياضة سواء كانت كوره أو أي رياضة أخرى
بالنسبة للرقة
أتفق معاكي في دي كمان
الرقة مش معناها الجهل بأمور الحياة ولا معناها إن الإنسان يكون لخمه وخيبه ومش فاهم حاجه في أي حاجه
الرقه دي أصلا صفة من صفات الإنسان السوي
وهي عكس الغلظه
ودي حتى من صفات المؤمنين يقول الحديث الشريف
يدخل الجنة أقوام أفئدتهم مثل أفئدة الطير
وقد فسر المقصود من الحديث بأن قلوبهم رقيقه ورحيمه
وكذلك يقول الله تعالى لرسوله الكريم
ه§( ولو كنت فظاً غليظ القلب لانفضوا من حولك )§ه
الحب من أول نظرة
أتفق معاكي في إن من الصعب إن الحب ييجي من أول نظره
بس برده انا شايف إن أول نظره ممكن تتخطي الإعجاب
ممكن نقول كدا إنها حاجه زي فتح باب القلب ناحية الشخص ده فيسهل على القلب أن يحبه بعد ذلك
متأسف على الإطاله في التعليق
بس البوست هو اللي دسم وماينفعش أعلق بأقل من كده .
الحب
الكورة
الرقة
.....
خليتيني أتسائل
لو أخدنا أول حرف من كل كلمة
يبقى حكر
أو كحر
أو حرك
يا ترى
المعاني دي ماذا تمثل
....
مجرد اعتباط
دمت بخير :)
تحياتي من ماناساس البلد
من اجمل وجهات النظر
بس مش كل البشر بيفكروا كدة
فعلا - للمفارقة - فيه ناس بتحب من اول نظرة
وحبهم بينجح قوي
بس احيان كتيرة بيفشل
لان الحب ببساطة
مالوش قاعدة
الام وامال
الكورة
انا اقصد الناس اللى بتقول انا مبحبش الكوة كدليل انه شخصية مختلفة او كده مش لان الكورة دلوقتى مبقتش رياضة كويسة وكده ,فهمتوا قصدى
الرقة
برده اان مقصدش لما نبقى بنتريق لا لما بنكلم جد وخاصة ان ده فعلا موجود وكتير ويتقال عللى البنت اللى من النوع ده رقيقة
شكرا
alaa salim
ماشى بس مش على حسابى طبعا
بالنسبة للكورة
انا مقولتش رياضى يعنى بيشجع الكورة انا اقصد يعنى بيحب الرياضة ويمارسها ,وكلامى فى الاول كان على الكورة لكن فى الاخر كان على الرياضة بصفة عامة
بالنسبة للرقة
فعلا اضافة مميزة ويا ريتنا كلها نتسم بيها
بالنسبة للحب
فعلا النظرة ممكن تتعدى الابتسامة فى ناس لما تشوفها ترتاح وناس لا
لا مفيش مشكلة ومتشكرة لتعليقكوا واسيبكوا تكملوا كباية الشاى
the groom
ودمتم انتم ايضا
مصطفى السيد ابراهيم
متشكرة , وعندكوا حق الحب ملوش قاعدة
وزاكم الله خير
أنا إتفصلت م الجامعة يا جدعاااااااااااااااااااااااان
الحقووووووووووووووووووووووووني
بصراحة شديدة
انا كنت باقرا مدونتك لمجرد العلم بالشىء
لكن بصراحة شديدة ايضا
عجبنى اسلوبك جدا وطريقتك فى الكلام
وخاصة فى موضوع الرقة
غسيل الفراخ وتقشير السمك وكده
وبالنسبة لموضوع الكرة
ففعلا كلامك يدل على معرفة جيدة ببعض الانماط الرجالية المستفزة
اما العبارة الاسنهلالية ففعلا موجزة لكنها صحيحة تماما ومعبرة عن الواقع لدرجة كبيرة جدا
الحب مش لازم ينتهى بالجواز , والجواز مش لازم يبتدى بالحب
تحياتى
والسلام
ياسر مدنى
لا حول ولا قوة الا بالله
ربنا يكون فى عونكوا وافتكروا انها ضاقت ولما استحكمت حلقاتها فرجت وكنت اظنها الا تفرج واستعين بالله قبل اى حد
وربنا يفرج كربكوا
ابو سويلم
بصراحة شديدة انا متشكرة جدا لصراحتكوا الشديدة
ومتشكرة على رايكوافى الموضوع والعبارة الاستهلا لية وقشر السمك
وعليكم السلام
Post a Comment