Sunday, April 3, 2011

عورت صبعى


امبارح قلت اقص ضوافرى قبل ما انام ، وانا بقص ضافر رجلى منغير مقصد قصيت حتة من صبعى اللى جمبه فاتعورت ونزل دم (بالنسبة لى ) كتير حوالى 20 نقطة تقريبا على رجلى والارض .. وعشان انا عندى فوبيا من الدم كنت خايفة ومضايقة اوى من شكله اكتر من الوجع نفسه وقبل معيط بلحظة ........

افتكرت الشهداء والناس اللى اتصابوا فى الثورة ، وكمية الدم اللى فقدوها وحجم الالم اللى حاسوا بيه ، لما انا عشان صبعى اتعور حسيت انى هموت خلاص واتوجعت اوى اومال هما حاسوا بإيه !!! ، وحسيت أد ايه الناس ده تعبت واتعذبت اوى علشانا ، وحسيت اد ايه انا تافهة .. وقررت معيطش وكتبت الكلام ده بعد مربطت صبعى


انا بحب الشهداء اوى ، تعبوا واتعذبوا اوى عشان نعرف نعيش ، وللاسف برده فى الآخر لسه فى ناس مش حاسة هما عملوا ايه ، وبرده

لسه فى ناس تافهة
لسه فى ناس سلبية
لسه فى ناس بتاخد رشوة
لسه فى ناس بتزعل على الدنيا
لسه فى ناس مش عارفة هى عايزة ايه
لسه فى ناس مبتخفش ربنا فى شغلها
لسه فى ناس بترمى زبالة فى الشوارع
لسه فى ناس كل همها الاغانى والبنات والصحوبية
لسه فى ناس بتتخانق على اتفه الاسباب
لسه فى ناس بتقول كلمة "عادى" اللى قررت الثورة حذفها من قاموسنا


انا بحب الشهداء اوى

بحبهم فى الله .. وبتمنى من ربنا ان الناس نتغير بجد عشان منضيعش دم الشهداء هدر .. وانهم يفتخروا بينا فى الجنة ويعرفوا ان احنا فدرناهم اوى وقدرنا اللى عملوا .. وان تعبهم مكنش فى اللا شىء .. وبتمنى ربنا يجمعنا بيهم فى الفردوس الأعلى


اللهم لا تجعلنى جسراً يعبر عليه الناس الى الجنة ويرمى به فى جهنم

7 comments:

eslamelruby said...

بسم الله الرحمن الرحيم
اولا الف سلامة على صابعك
ثانيا انتى انسانة غريبة فعلا
ثالثا انتى بتفهمى
رابعا انا فخور بيكى وانى اعرفك وانك اختى وده يشرفنى

بجد ربنا يحميك
اخوكى اسلام الروبى
eslamelruby@yahoo.com

موناليزا said...

عجبنى احساسك

انسااااااااانة....غريبة said...

eslamelruby

اولا : الله يسلمك
ثانيا : عارفة
ثالثا : شكرا
رابعا : وانا ايضا

امين يا رب العالمين

انسااااااااانة....غريبة said...

موناليزا

شكرا ليكى

ريبال بيهس said...

مساء الخير

أنتي مش أنسانة غريبة أنتي أنسانة جداً فلا تحسي بشعورعلى مؤلم لأنه كفاية أحساسك بوجع غيرك عشان تعرفي قد أيش أنتي أنسانة جداً ...

رحم الله من دفع حياته ثمن للحرية وعافا المصابين وجازا الظامين على ظلمهم ...

تحياتي

م/ محمود فوده said...

شكرا على مقالك والف سلامة ليكى
للاسف بعض الناس طول حياتهم السابقة كانوا خارج الحدث
قبل تنحى مبارك بيومين جارتى قالت لى هم مش شهداء قلت لها الثورة هتنجح
وهيكون شهداء
للاسف حتى الان بعض الناس بدافع عن مبارك وعصبته برغم من تهمته الاساسية باغتصاب الوطن
http://www.life.com/image/77249397/in-carousel/18151

Uouo Uo said...


thx

كشف تسربات المياة
غسيل خزانات
شركة نظافة عامة