عورت صبعى

امبارح قلت اقص ضوافرى قبل ما انام ، وانا بقص ضافر رجلى منغير مقصد قصيت حتة من صبعى اللى جمبه فاتعورت ونزل دم (بالنسبة لى ) كتير حوالى 20 نقطة تقريبا على رجلى والارض .. وعشان انا عندى فوبيا من الدم كنت خايفة ومضايقة اوى من شكله اكتر من الوجع نفسه وقبل معيط بلحظة ........

افتكرت الشهداء والناس اللى اتصابوا فى الثورة ، وكمية الدم اللى فقدوها وحجم الالم اللى حاسوا بيه ، لما انا عشان صبعى اتعور حسيت انى هموت خلاص واتوجعت اوى اومال هما حاسوا بإيه !!! ، وحسيت أد ايه الناس ده تعبت واتعذبت اوى علشانا ، وحسيت اد ايه انا تافهة .. وقررت معيطش وكتبت الكلام ده بعد مربطت صبعى

انا بحب الشهداء اوى ، تعبوا واتعذبوا اوى عشان نعرف نعيش ، وللاسف برده فى الآخر لسه فى ناس مش حاسة هما عملوا ايه ، وبرده

لسه فى ناس تافهة

لسه فى ناس سلبية

لسه فى ناس بتاخد رشوة

لسه فى ناس بتزعل على الدنيا

لسه فى ناس مش عارفة هى عايزة ايه

لسه فى ناس مبتخفش ربنا فى شغلها

لسه فى ناس بترمى زبالة فى الشوارع

لسه فى ناس كل همها الاغانى والبنات والصحوبية

لسه فى ناس بتتخانق على اتفه الاسباب

لسه فى ناس بتقول كلمة "عادى" اللى قررت الثورة حذفها من قاموسنا

انا بحب الشهداء اوى

بحبهم فى الله .. وبتمنى من ربنا ان الناس نتغير بجد عشان منضيعش دم الشهداء هدر .. وانهم يفتخروا بينا فى الجنة ويعرفوا ان احنا فدرناهم اوى وقدرنا اللى عملوا .. وان تعبهم مكنش فى اللا شىء .. وبتمنى ربنا يجمعنا بيهم فى الفردوس الأعلى

اللهم لا تجعلنى جسراً يعبر عليه الناس الى الجنة ويرمى به فى جهنم

الأب الضـــــال

بابا ده احب واحد ليا فى الدنيا
انا بابا ده صحبى اللى بحكيله كل حاجة
انا قدوتى ابوية اللى منغيره مكنتش هابقى كده
انا ابوية داق المر عشان يعرف يعيشنا ويطلعنا محترمين
حضن واحد من بابا يغنينى عن كنوز الدنيا
انا نفسى اتجوز واحد زي ابويا كده
...............................................................

أنا مش فاهماكوا .. انتوا بتقولوا ايه .. هو فى كده ؟؟؟
هو فى يعنى حد باباه غالى عنده اوى كده ؟؟
هى الإبوة ده حاجة حلوة اوى كده؟؟
هو مش بابا ده اللى هو بيجيب فلوس وكده (ده لو كان بيجيب اصلا)؟؟
هو مش بابا ده اللى هو .............!!!! مش عارفة

طول عمرى وانا بسمع صحباتى والناس اللى حواليه يقولوا بابا عمل بابا سوى بابا جاب بابا ....... بس كنت بستغرب ان فى أبَهات كده حتى افتكرت ان دول شواذ الأباء اللى هما يعنى نادر اوى لما يكونوا موجودين .. بس شوية شوية عرفت ان فى كتير اوى من الابهات دول .. ان فى ابهات بجد .. ابهات حقيقيين

.. احساس وحش اوى اوى اوى انك تحس انك يتيم وابوك عايش

انك تدور على الابوة فى عيون كل واحد كبير فى السن
انك تتلهف انك تسمع حد بيحكى عن باباه وافعال الابهات الحقيقيين
انك تعرف ان فى حد باباه هو صاحبه وابوه واخوه وكل حاجة فى حياته
انك تشوف ناس حاسة بالأمان لان عندهم آباء ضهر ليهم يتسندوا عليه فى اى وقت

احساس وحش اوى

ان حد يسالك باباك عايش ولا لا وهو موجود

انك تحس بضياع اخ من اخواتك بسبب افتقاده للإبوة فى حياته

انك متلاقيش بسمة حب من باباك فى وقت تكون محتاج لها

انك متشفش نظرة حنان فى عنيه بتصرخ وتقول بحبك يا ابنى

انك تختلق حكايات عن والدك ومواقفه العظيمة فى حياتك عشان مظهرك ادام الناس

احساس وحش اوى انك تفتقد

انك تنام مطمن عشان باباك فى البيت هيحافظ عليك ويحميك من اى اذى

انك يوم متحتاج مشورة تلاقى حد عقلانى تكلم معاه وتاخد رايه

انك تنسب نجاحك فى حياتك لتشجيع باباك ومؤازرته ليك بعد توفيق ربنا

احساس وحش اوى

ان يكون وجود باباك فى حياتك زى عدمه . . . . .

عليه العوض ومنه العوض فى كل أب محى احساس كل المعانى ده من عند ولاده

أرجوك أرجوك أرجوك اوعى فى يوم من الايام تكون انت الأب ده (مهما كان عذرك).. أرجوك

ملحوظة

ليس بالضرورة أن يكون من اتحدث عنه هو أبى

.. ولكنه يمثل نسبة كبيرة من أبائنا الآن
.. لن يشعر بمعنى كلماتى سوى يتيم أو انسان تيتم ووالده على قيد الحياة

أيها الكلمنجية .. اسكتوااااااااا

عشان كده مكنتش بكتب حاجة الفترة اللى فاتت بصراحة جالى زهق من الكلام واللى بيكلموا

تفتح التلفزيون تلاقى كل الناس بتكلم

برامج تافهة

اتصل بسرعة عشان تكسب التريليون جنيه الحق الفرصة
انت لسه مكلمتناش مستنى ايه التليفونات جيالنا كتييير
يخربيتك ايه الصداع ده انا معرفش البنى ادمين اللى بيتصلوا دول بييجوا منين

برامج هادفة

وحضرتك شايف ايه سبب الفساد اللى حاصل دلوقتى .. وتلاقى الضيف نفسه راس من رؤؤس الفساد
والله هو المشكلة ان .. عشان مفيش ... لكن لو عملنا .... هيحصل .... ونسمع اغنية عظيمة يا مصر يا ارض المحن يا عم انت بقى عملت اييييه بحكم منصبك؟

برامج دينية

طبعا مش هقول حاجة على البرامج المحترمة زى برامج الشيخ محمد حسان وغيره بس احنا محتاجين مشاركة الشيوخ لينا ينادوا بحق الشباب فى الاهتمام بطموهحم ويقفوا ادام الظالم اللى لا عمل حساب لربه ولا لشعبه ومطالبة المسئولين الكبار بانهم يتقوا الله فى عملهم, ومش كفاية تقولنا انت لازم تتوب عن المعاصى و....و

يشيوخنا المشكلة اننا اصلا مش عارفين ان اللى احنا فيه ده حرام او غلط واللى عارف مننا انه غلط مش عارف حجم وخطورة الحرام ده ايه

بلاها التليفزيون افتحلنا الراديو يا ابنى

وقد افادت الاخبار ان كل ما حصل امبارح حصل انهاردة تانى
انهاردة هنكلم عن انفلونزا الناموس
موضوعنا عن الحب ازاى تحب وانت نايم ولا على جنب كده ولا حاطط رجل على رجل ونقول الو

اقولكوا بلاها وسائل الاتصالات خلينا فى المواصلات

وطبعا كلنا عارفين لو الواحد ركب مواصلتين تلاتة فى اليوم بيرجع عامل ازاى من الصداع اللى بيعيشه
والله مانت دافع خلى عندك لا يا عم هو كل مرة ولا ايه .. يووه اى حد يدفع ويخلصنا
باقى بريزة يا اسطة وفى واحد ورا مدفعش .. انت مالك متقول باقى بريزة وخلاااااص
ولا الاغانى اللى السواقين بيشغلوها ده لوحدها كفاية

حتى فى المدونات بيتكلموا , فى الصحافة بيتكلموا , فى الشارع بيتكلموا وتحس ان الارض بترغى عربى مش بتكلم مفيش بلاستر نسكتها بيه

والله انا حتى وانا بكتب الموضوع ده اتخنقت منى مانا كمان بكلم بس هعمل ايه مهو انا لازم اتكلم (انتى عندك فصام يا انسانة ولا ايه) لا والله انا معنديش اعتراض اننا نكلم بس الكلام هيوصلنا لايه وهيحققلنا ايه وهيغير ايه هو ده اللى انا بتكلم فيه

انتى عايزة ايه؟

البرامج السياسية او الهادفة عامة يتجيب ناس تغيرلنا اللى مش عاجبنا فعلا يمتجبيش , مش كل واحد يقولنا الحلول كذا وكذا ومش لاقيين حد ينفذ, كله بيحط حلول اومال مين اللى هينفذهاااا

الصحافة والمدونات يتقولوا كلمة طيبة تحسن نفسيتنا او تفيدنا اجتماعيا او ترقى مستوانا الفكرى والثقافى يمتقولوش

الناس اللى فى الميكروباس حد عزم عليك خلااااص مش هتقعد ساعة تقوله شكرا, ومش هوصيكوا على الاغانى

ليا ولكل الناس: وقفوا لسانكوا شوية بقى وشغلوا ايديكوا

اومال ربنا عز وجل ادانا ايدين ورجلين واذنين ولسان واحد ليييييييييه

واخيرا: انا قريت قبل كده ان الكلام اللى بيطلع مننا تلات حاجات

1- نثاب عليه وهو الامر بالمعروف والنهى عن المنكر
2- نعاقب عليه وهو الكلام السىء كالسب او الامر بالمنكر ونحوه
3- لا نثاب ولا نعاقب عليه وهو ما يطلب به حاجة زى انا عايز اشرب

بس خلاص, يا ريت بقى نقلل كلامنا شوية ونزود افعالنا الطيبة والمفيدة ونشوف ايه اللى هيحصل والبلد ده او الانسان نفسه هيتغير ازاى

و احب اسمع اغنية كلام الناس لا بيقدم ولا ياخر واهديها لماما نوال

ربنا يقدم اللى فيه الخير

يا رب انا عايزة لما اكبر ابقى رفيعة اوى مش عايزة ابقى زى البنات كده
يا رب مدخل كلية فى المحافظة بتاعتى
يا رب مطلع مدرسة

ايوة انا كنت دايما بدعى بكده زمان وكنت دايما اتمنى كده واقول لنفسى لو ده محصلش تبقى مصيبة او حاجة وحشة اوى اوعلى الاقل مش هكون فرحانة , والغريب انى لما كبرت اتحققت الدعوة الاولى ومتحققتش الدعوة التانية ولا التالتة , ودخلت كلية تربوية وكمان جنب بيتنا يعنى حتى مش فى الجامعة وانا كان نفسى اسكن فى مدينة جامعية واروح بلد تانية و.. ما علينا
ده شوية من الحاجات اللى كنت بتمناها وعايزاها زمان لكن فى حاجات تانية كتير الواحد كان بيتمناها وبيدعى ربنا بيها

منها اللى اتحقق ومنها اللى متحققش.. طب ليه؟

سبحانك يا رب

بس الواحد لما كبر وفكر شوية فى اللى بيحصل فى حياته فى اللى اتحقق من احلامه واللى مش اتحقق لقى حاجة غريبة

جدا, ان اللى حصل فعلا هو احسن حاجة كان ممكن تحصل وان نظرة الواحد للامور بتختلف جدا من مرحلة لمرحلة

تانية, يعنى لما تكون صغير بتفكر وبتفهم اللى بيحصل وتوزنه غير لما تكون شاب وبتفهم اكتر وتدرك ما وراء الامور

اكتر كل لما سنك وخبرتك فى الحياة بتزيد اكتر

يعنى انا مثلا بعد مدخلت الكلية وبالرغم انى فى الاول كنت ارفانة منها جدا ومش طايقاها بس بعد كده حسيت انها متفصلة عليه وان مفيش كلية انسب منها ليا ولا حاجة تتفق معايا غير المواد اللى باخدها , وشوية شوية بعد معرفت الناس اللى بيدخلوا كليات بعيدة عن محافظتهم او بعيدة عن بيتهم او بيسكنوا فى مدن جامعية بيتعبوا اد ايه حسيت انى فى نعمة وان انا مرتاحة اوى وعندى وقت كويس اوى عشان اعمل حاجات تانية بجانب الكلية زى الجمعيات الخيرية او الخروج او غيره وكمان لان الكلية جنب بيتى فالواحد مش حاسس لا بتعب مواصلات ولا حر صيف , يااااه بجد الواحد فى نعمه , ولما فكرت فى الامنية الاولى اللى اتحققت قلت يمكن ربنا حققلى الامنية ده عشان اعرف ان مش كل اللى انا عايزاه صح او هو الاحسن اوعشان افهم اللى فهمته دلوقتى او يمكن لان ده احسن حاجة ليا عشان ده يساعدنى انى اشترك فى اعمال كتيرة تانية يعنى انى اكون نشيطة واعمل اكتر من حاجة فى وقت واحد او يكون ليه سبب انا مقدرش ادركه دلوقتى او حكمة لله عز وجل عقليتى اصغر من انها توصلها

ممممممممم .. بــــــــــــــــــــــــس خلاص

انا كده فهمت , يعنى المفروض الواحد يسلمها لله انا عارفة انى غلطانة لانى كان المفروض افهم ده من زمان اول مقلت لا اله الا الله بس الواحد طول مهو عايش بيفهم حاجات اكتر وبيدرك الامور بشكل اوسع وايمانه بقدرة الله والوهيته بتزيد اكتر واكتر,فعلا كل حاجة حوالينا بتحصل بتدل انه لا اله الا الله , وعشان كده انا قررت من دلوقتى انى متمناش اى حاجة مش عارفة هى خير ليا ولا لا حتى لو فى نظرى انها الخير ليا , وانى لو اتمنيت حاجة وحصل غيرها اسلم ان ده الخير وارضى بيه , حتى لو ده كان عقاب من ربنا فاكيد لو انا رضيت بيه كعقاب او كخير ربنا هيراضينى بيه وهيعوضنى احسن منه

اللى فيه الخير يقدمه ربنا

يااااااه اد ايه الجملة ده مريحة وفهمها وتعميمها وتطبيقها مريح اكتر , فعلا الواحد لما يحتار فى حاجتين افضل حاجة يدعى ربنا انه يقدمله اللى فيه الخير وانه يسلم الامر لربنا ويرضى بنصيبه واللى مكتوب له , طبعا بعد مياخد بالاسباب ويعمل اللى عليه , يعنى اى حاجة الواحد يحتار فيها او مش يكون عارف ايه الافضل ليه او حتى لو عارف الاحسن ليه

برده تدعى ربنا يقدم لك الخير لانه مهما كان عنده بصيرة بالامور ففوق كل ذى علم عليم واكيد اللى ربنا عايزه هيكون

افضل حاجة ليه لان ربنا حكيم وأرحم بالانسان من نفسه بيه ونخلى دعوتنا فى كل امور حياتنا (ربنا يقدم ما فيه الخير)ا

قال تعالى: (قُل لّن يُصِيبَنَآ إِلاّ مَا كَتَبَ اللّهُ لَنَا هُوَ مَوْلاَنَا وَعَلَى اللّهِ فَلْيَتَوَكّلِ الْمُؤْمِنُونَ) [سورة: التوبة - الأية: 51]ا

توكلنا عليك يا رب

اللهم قدم لنا ما به الخير

اللهم راضنا بما اعطيتنا

اللهم لا تجعلنى جسرا يعبر عليه الناس الى الجنة ويرمى به فى جهنم

حسنة قليلة.. تمنع بلاوى كتيرة

لا والله مبشحت متخافوش ، انا عارفة القلم وحبره قصدى (البير وغطاه) انا بس عايزة اعرف انت متطوع فى

جمعية رسالة
جمعية صناع الحياة
الجمعية الشرعية
جمعية المحافظة على القران الكريم
اى عمل خيرى
بلاش ده

بتروح زيارات لدار ايتام
مدارس صم وبكم
اتعاملت مع اطفال معاقين
بلاش ده

بتعمل صدقة جارية
بتكفل يتيم
بتساعد اسر محتاجة
بتعلم طالب علم مجانا
لا بقى ... مفيش بلاش ده

انت عايش ليه اصلا ؟

عشان اعبد ربنا واعمر الكون .. مهو العمل الصالح عبادة وهو انت هتعمر الكون ازاى؟؟!! ... يلا كفاية كلام بقى

متقولش مبعرفش اتعامل مع الناس واختلط بيهم
وهما اللى بيعرفوا يتعاملوا مع الناس احسن منك فى ايه ، روح واختلط وواجه الناس وانت هتكون اجتماعى

متقولش مفيش فلوس
ومين قال ان عمل الخير كله فلوس ، روح الاماكن ده واسال وانت تعرف ان فى حاجات كتير خيرية منغير فلوس

متقولش صحابى مش بيشجعونى
وانت ليه متشجعش صحابك وليه متروحش لوحدك وهناك هتعرف ناس كتير هتشجعك

متقولش مفيش وقت
مانت بتقعد بالساعات عالنت – بتخرج مع صحابك – بتتفرج على التلفزيون ، حتى لو كان كل وقتك شغل خصص ساعة واحدة منه على الاقل للخير

على فكرة عمل الخير مش حاجة طيبة او حلوة انا بعملها ونفسى الناس كلها تعمل زيى او موضة زى مبيتقال لا ده امر من اوامر ربنا ، قال تعالى

بسم الله الرحمن الرحيم

"والذين ءامنوا وعملوا الصالحات أولئك أصحاب الجنة هم فيها خالدون"

" ويأمرون بالمعروف وينهون عن المنكر ويسارعون في الخيرات".

" يا أيها الذين آمنوا اركعوا واسجدوا واعبدوا ربكم وافعلوا الخير لعلكم تفلحون"

" أولئك يسارعون في الخيرات وهم لها سابقون"


http://www.arabvolunteering.org/corner/avt10458.html


مش هقول حاجة تانية بعد كلام ربنا واكيد مش هتفكر لسه انك تروح لواحدة من الجمعيات ده وتتطوع معاهم او انك تكلم صحابك وتعملوا عمل خيرى خاص بيكوا او انك حتى تروح لوحدك لدار ايتام او مدرسة معاقين او اسرة محتاجة وتشاركهم وتساعدهم ، يلا اشوفك هناك بقى
يا باغى الخير

بس خلى بالك
النية وتجديد النية
افضل الاعمال ادومها

اسال الله ان يجعلنا واياكم ممن يسارعون فى الخيرات

اعوذ بالله ان اكون جسرا يعبر عليه الناس الى الجنة ويرمى به فى جهنم

لن يسبقنى الى الله احد

اولا : بهنيكوا بحلول شهر رمضان الكريم (كل سنة والامة الاسلامية كلها بخير وسلام وحب وامان وسعادة )ا

ثانيا : بهنى نفسى لان مدونتى بتتشرف بان ده يكون تانى رمضان يمر عليها وترحب بيه وتكلم عنه , زى مبيتشرف واحد عاصى عارف نفسه انه ولا حاجة بمرور ولى من اولياء الله الصالحين على بيته

وحشتنى اوى يا رمضان
.........................
مش عارفة اقول ايه , وحشنى كل حاجة فيك هدوءك وروحانياتك و جوك الايمانى الجميل , وحشنى لمة الناس فيك وصلة الرحم اللى الناس تكاد تكون مش بتفتكرها الا فى ايامك (الا من رحم ربى) وحشتنى المشاعر والصفات والاحاسيس الجميلة اللى الواحد بيحسها بتزيد عند الناس فى وجودك من كظم الغيظ والعفو عند المقدرة والمسامحة والطيبة والحنان والرضا والادب والحياء والتقى والنقاء وصفاء الروح والذهن والابتسامة الجميلة اللى بتترسم على وشوش الناس واعمال الخير والعطاء اللى بلا مقابل والحب اللى بحسه فى عيون الناس قبل كلامهم وحشنى الخشوع فى الصلاة والبكاء من خشية الله ودعوة الامام فى صلاة التراويح والتاميم وراه والدعوة ساعة الفطار , ياااااااااااه وحشنى كل حاجة فيك والله , يا ريت السنة كلها كانت رمضان

وكعادة الحبيب لحبيبه انه فى وجوده بيبقى عايز يعمله كل اللى يرضيه ويعرفه بحبه ليه واللى يكسب بيه حبه ورضاه وانه ميكونش زي اى حد لازم يتميز فى كل حاجة عشان ينول ثمار حبه وثواب رضاه

ومكنش فى احسن من شعار (لن يسبقنى الى الله احد) عشان يعبر عن الحماس والاصرار اللى المفروض يتحلى بيهم المحب (الصائم) فى الالتزام بكل ما يجعله احسن واحد فى نظر حبيبه (شهر رمضان)

فى العبادة
هصلى الفروض الخمسة فى وقتهم والسنن كلها
هصلى صلاة الضحى والتراويح يوميا
هقول اذكار الصباح والمساء يوميا
هذكر ربنا واستغفره طول اليوم
هدعى ساعة الفطار ووقت السحور وفى السجود وكل وقت ليا وللمسلمين جميعا
هبكى واخشع فى الصلاة ولو معرفتش هحاول اقرا واعرف ازاى اخشع وابكى فى صلاتى

فى الخير

هزيد من اعمال الخير والصدقات وشنط رمضان والمشاركة المادية والمعنوية للمحتاجين
بالاستراك مع اهلى او اصحابى او جيرانى او التطوع فى الجمعيات الخيرية كرسالة وصناع الحياة والجمعية الشرعية .. الخ

فى صلة الرحم

هبر امى واقاربى بالمساعدة والكلمة الطيبة والتهنئة والدعوة ليهم والحرص على عدم اغضاب اى منهم وارضاء الجميع ونشر روح الحب والمودة والتعاون والسعادة والمرح بينهم

ولن يسبقنى الى الله احد


توصيات رمضانية

يا ريت كل واحد فينا يخلى فى بينه وبين ربنا اسرار محدش يعرفها او يطلع عليها غير ربنا عز وجل (صدقة – صلاة – دعوة – عمل خير ) مثلا يتصدق بصدقة فى وقت مش فيه حد غير اللى اتصدق عليه بس او يقدم شنطة رمضان لمحتاج منغير محد يشوفه او يتوضا ويصلى ركعتين لله او حتى يبتسم فى وش الناس بغرض ادخال السرور عليهم ... وهكذا , نحاول يكون فى بينا وبين ربنا على الاقل تلات اسرار خلال الشهر الكريم بحيث وانت بتدعي ربنا تدعيه بالاسرار اللى بينك وبينه( باعمالك الصالحة) , زى الثلاثة الذين دخلوا الكهف واغلق عليهم وبدا كل واحد يفتكر عمل صالح كان بيحرك الصخرة لحد مالكهف اتفتح

انا عارفة ان من علامات تقبل صيام رمضان منك انك تطلع من رمضان احسن مدخلت يعنى تخرج بعبادة مكنتش بتعملها قبل رمضان او بصفات مكنتش موجودة فيك قبل رمضان او بقلب اطهر واصفى من حال قلبك قبل رمضان , عشان كده لازم كل واحد فينا يحرص انه يخرج من رمضان بعبادة (سنن مكنش بيصليها – قراءة ورد دائم من القران – حفظ للقران – ذكر .. ) وبصفات ( كظم غيظ – تفاؤل عفو عن الناس ... )ا

3) قبل رمضان يا ريت نسامح أى حد غلط فى حقنا ونطلب السماح من اى حد غلطنا فى حقه – نتوب توبة صادقة لربنا – نحاول نقطع علاقتنا باى حاجة ممكن تبعدنا عن ربنا فى رمضان – نحضر قلبنا للاغتراف من بحر الثواب



ان فى ناس كتير توفاها الله قبل شهر رمضان (اللهم ارحمهم جميعا) وان انت ربنا كتبلك تبلغه وده نعمة تستاهل الحمد وتستاهل انك تقدرها وتستفاد منها وفكر نفسك دايما ان محدش عارف اذا كان هيعيش لبلوغ رمضان القادم ولا لا

اسال الله ان يتقبل منى ومنكم صيام شهر رمضان

وكل عام وانتم بخير
رمضان كريم


اللهم لا تجعلنى ممن يقولون ما لا يفعلون واجعلنى ممن يقولون القول فيتبعون احسنه
واعوذ بالله ان اكون جسرا يعبر عليه الناس الى الجنة ويرمى به فى جهنم

كفاية بقى يا بابا

انا والله فكرت كتير اوى وكنت دايما بسال نفسى انت ليه بتعمل فيه انا واخواتى كده , قعدت سنين طويلة اسال وابحث واحاول افسر انت ليه بعت ابوتك بالسهولة دى ؟ قلت لنفسى وقالتلى ؟

معلش ضغوط وهموم وديون وبيت للغريب مرهون
واحنا مالنا مهو السبب فى الديون ده وهو اللى غرقنا فيها
اصله مش واخد باله مسئولياته كبيرة وكتيرة ومحدش حاسس بيه
مش اد المسئولية يسيبها لغيره ده مش ورث ده بيت وحرث
مهو مش بيدير البيت لوحده فى اكبر منه بينهبوه واصغر منه بيستغلوه
وهو ليه يسمح للى اكبر منه بنهبنا ويسيب اللى اصغر منه يسرق حقنا
بس مهما كان فاسد - انانى - حرامى - جبان برده طاعة ولى الامر لازمة وده امر ربنا
حتى لو كان ولى الامر فاسد او مش مننا حتى لو كان بيامرنا باللى يغضب ربنا

انا مش هعاتبك كتير انا بس عايزاك تشوف انت عملت ايه فينا وكمان فى امنا

اخوية الكبير مات
مات موتة ربنا
بس هو مات من القهر والظلم والاستبداد مات فى سبيل حرية المفروض انها من حقنا

اخوية التانى ضاع
ضاع وسط الهنا
لأ وسط الاغانى والفتن والتفاهات وجامع اتهد وكباريه اتبنى

واختى باعت جسمها
وانا مالى ده ملكها
اه ملكها بس ده عرضنا وشرف راح يوم مشديت بايدك حجابها اللى كان سترنا كلنا

واخوية الصغير ادفن
هو اللى باع مش انا
مهو باع عشان رغيف العيش (اللى حتى هو انعدم) باع اعضاؤه واشترى بيهم الكفن

ومش هكلمك عن اللى هج وساب البلد ولا اللى لحد دلوقتى فى المعتقل ولا اللى حلم وحلمه اتدبح
وتقولى بتنا هيتقدم بينا والخير هيملاه ويكفينا

وهو فين البيت مخلاص اتردم
وبقى ذكرى كلها جرح والم
ودموع ام مليانة حسرة وندم
ام كانت دايما حاضنة العلم
وقعت وسط ولادها واتصفى الدم
صرخ التاريخ لحظتها سقط العلم

كفاية بقى يا بابا