ابتسامتك كنزك
فى ناس كتير بيكون كنزها اللى بتحاول تكسب بيه حب اللى حوليها موبايل او عربية او لبس او حتى لاب توب , كنز
مزيف لان مجرد انه يفقد الحاجة ده بيفقد حب الناس (الظاهرى طبعا) ليه , انا شايفة ان الكنز الحقيقى اللى تعرف
بيه تكسب حب الناس ليك هو ابتسامتك , الكنز الحقيقى اللى بيرقق القلوب ويصفى النفوس , فليه متكونش ابتسامتك
هى كنزك
ابتسامتك كنزك لما بتبقى مبسوط ومتكتفيش بنفسك وتبقى عايز تبسط كل اللى حواليك
ابتسامتك كنزك لما تكون فى بلاء او شدة ومتبقاش عايز تضايق حد معاك , ابتسامتك الراضية كنزك
ابتسامتك كنزك لما تتعامل مع بياع فى السوق او صاحب السوبر ماركت وتبتسم وانت بتطلب طلبك
ابتسامتك كنزك لما حد يغلط فى حقك او يظلمك وتبتسمله ابتسامة عتاب اللى منغير كلام بتحسسه بغلطه
ابتسامتك كنزك لما تحب حد ومتبقاش عارف تعبر له عن حبك غير بابتسامتك اللى هو بيفهمها افضل من مية كلمه حب
كنت هتقولها
ابتسامتك كنزك لما تدخل من باب شقتكوا وانت جاى من زحمة وحر وتعب وتبتسم لاهل بيتك
ابتسامتك كنزك لما تدخل على الجروب بتاعك وتلاقيهم قلبوها غم علشان الزمالك خسر الماتش فتبتسم وتقولهم يعنى
هما كانوا كسبوه امتى هههه (محدش يزعل انا زملكاوية اصلا)
ابتسامتك كنزك لما تبقى ماشى فى الشارع وتتكعبل فى طوبة وتقع على الارض وانت قايم تلاقى الناس بيبصولك
علشان يعرفوا رد فعلك وانت تفاجئهم بابتسامتك اللى تحول الموقف من موقف محرج لموقف لذيذ
ابتسامتك كنزك الذى لا يفنى الا بفنائك
ابتسامتك كنزك الذى يجلب لك السعادة والحب
ابتسامتك كنزك الذى تخطى به على المصاعب والمشاكل
ابتسامتك كنزك اللى مش بيكلفك غير تحريك كام عضلة من عضلات وجهك ( يعنى كمان تمارين رياضية ابسط يا عم)
خلى بالك
لا اقصد بالابتسامة الضحك ولكن مجرد الابتسامه يعنى مش هتتعب فى حاجة مش مهم ابتسامتك تكون جميلة وعندك
نغزتين يعنى , يكفينى انها تكون من القلب وبرضا وحب
افضل الابتسامة لما تكون عينك بتبتسم مع شفايفك
كان رسول الله صلى الله عليه وسلم بساما
اذاردت حب الناس فعليك ان تمتلك كنزا
انا كنزى الابتسامة وانت كنزك ايه؟
16 comments:
:)
ان كان قلبك باسماُ ظهر ذلك على وجهك
فابتسم الان قد لا تقدر على ذلك غدا
قال رسول الله (صلي الله عليه وسلم):تبسمك في وجه اخيك صدقة
وقال(صلي الله عليه وسلم):لاتحقرن من المعروف شيئا ولا ان تلقي اخاك بوجه طلق0
في احد اخواني محدش مبيحبوش فعلا كل الناس بتحبه لانه فعلا بيحب الناس ولان لمبتسم لكل من يراه ففعلا كسب حب كثير من الناس
تاني حاجة
ايه مال الناس بالزمالك هو كل واحد مش لاقي حاجة يتريق عليها يلف علي الزمالك
الهزائم دي ابتلائات وان الله اذا احب قوما ابتلاهم
هههههههههه
يعني الزمالك ده من الاخر فرقة واصله
والسلام
semsem
عندك حق اليوم نقدر ولا نفعل وغدا نريد ان نقعل ولا نقدر
وجزاكم الله خير
اليعقوبى
صدق رسول الله صلى الله عليه وسلم
وفعلا انا عن تجربة متاكدة ان اكتر حاجة تخلى الناس ترتاح للشخص وتحبه هى ابتسامة وروح الشخص ده مش بقولكوا كنز
ومحدش يقدر يقول كلمة على الزمالك طبعا فرقة واصلة هتقولولى يلا بلاش نتكلم
ابتسم انت فى مصر !!!!!!
ههههههههههه
ايوة ايوة الابتسامة على وجوه المصريين امال ايه
من الغلب اللى هما فيه
السلام عليكم ورحمه الله وبركاته
هي الابتسامه
قال رسول الله (صلي الله عليه وسلم)
لا تحقرن من المعروف شيء حتي لوا تلقي اخيك بوجه طلق
وقال رسول الله
صلي الله عليه وسلم
الابتسامه في وجه اخيك صدقه
صدق رسول الله صلي الله عليه وسلم
اما بخصوص انك كونتي مسفره
فمعلش انا اسف لانك بتعلقي باسم مستعار(انسانه)هو نفس اسم المستعار لبلوج اخر
ونورتي المدونه
hollow
وعليكم السلام ورحمة الله وبركاته
متشكرة جدا للاضافة انا كنت محتاجة جدا للحديثين دول وصدق رسول الله صلى الله عليه وسلم
يعنى كمان مش كنز لكسب حب الناس لا وكمان ثواب وخير وطاعة للرسول عليه الصلاة والسلام
ايوة فعلا انا كنت قلت ده فى مدونة تانية افتكرت عامة حصل خير
وجزاكم الله خير
قال رسول الله صلي الله عليه وسلم تبسمك في وجه اخيك صدقة
الانسان لما بيضحك من القلب بيكون افضل من اللى بيضحك من الظاهر
ادعوكى لزياره مدونتى
تحياتى
الايام
صدق رسول الله صلى الله عليه وسلم
وفعلا اهم حاجة انك تضحك من قبلك مش من الظاهر بس علشان اللى قدامك يحس بالابتسامة
يعنى زى مقلت تكون بحب ورضا
ومتشكرة جدا للدعوة
قالوا أن الابتسامة كالحجر الذى إن ألقيتي به فى الماء قام بعمل دوائر تتسع وتتسع فكذلك الحال مع الابتسامة فهى تعمل على توسيع دائرة العلاقات الشخصية وتفتح مغاليق القلوب تماماً كما تفتح أنسام الربيع الندية براعم الزهور
ملحوظة مهمة لاحظتها : الفترة اللي فاتت كل ما ادخل على مدونة من المدونات غالبا الاقي نغمة حزن و شجن , و أخبرا لاقيت مدونة فيها ابتسامة
أدام الله ابتسامتك
:)
محمد
الله على المثل اول مرة اسمعه, وممكن برده تكون الابتسامة كنسمة الهوا التى اذا مرت على شخص اسعدته وخففت عنه (وده برده اول مرة اسمعها لانى لسه حاساها دلوقتى )
ملحوظة : من الغلب اللى الناس فيه , بس ده ميمنعش من وجود ابتسامة فى احد المدونات , متشكرة
امين
السلام عليكم
ازيك يا انسانه
عجبنى البوست دا اوى
وعجبتنى كمان التعليقات مخلوش لى حاجه اقولها
وجزاكى الله خيرا وربنا يجعله فى ميزان حسناتك
صانعة الحرية
وعليكم السلام ورحمة الله
انا الحمد لله
متشكرة جدا
جزانا واياكم
ونورتى المدونة
تبسمك في وجه أخيك صدقة
ربنا يكرمك ويسعد أيامك يا رب
تحياتي لك من ماناساس البلد لكل أهل الشرقية
the groom
فعلا واحنا محتاجين للصدقة السهلة ده جدا
امين يا رب واياكم
شكرا (معلش معرفشش لما حد بقولى تحياتكاقوله ايه) عامة شكرا بالنيابة عن اهل الشرقية
Post a Comment