كل سنة وانا طيبة

اكيد عرفتوا النهاردة ايه , ايييييوة انهارضة الحد هههههه ايه الشطارة ده مانتوا حلوين اهو , لا انهارضة عيد ميلادى

ايه عيد (استغفر الله العظيم ) بدعة بدعة

خلاص خلاص انهارضة يوم ميلادى حلو كده , على فكرة الشرقية كلها بتحتفل بيوم ميلادى انهارضة , لا لا مش عيد الشرقية القومى انتوا مش عارفين حاجة دول بيحتفلوا بيا

المهم بقى تعرفوا انا انهارضة بقيت 19 سنة ( يااااه الواحد عجز اوى) , بس عيد الميلاد ده غير باقى الاعياد اللى فاتت , اه انسانة لسه زى مهى بطيبتها بابتسامتها بطموحها باحلامها بجنونها بعقليتها (اللى انا بحترمها جدا) بسذاجتها بتسرعها احيانا , بس برده فى حاجات كتير اتغيرت بس مش للاحسن , اظاهر اننا كل مبنكبر همومنا بتزيد يمكن لاننا بنعتمد على نفسنا اكتر , مسئوليتنا بتزيد اكتر , يمكن علشان بنحتك بالدنيا وناسها اكتر , بنعرف حاجات مكناش نعرفها وبنعيش حاجات معشنهاش قبل كده , بنمر بتجارب بتعلم فينا بالايجاب او السلب , بننجرح بننهزم بننكسر بنقوم بنكمل بنقاوم بننجرح تانى وهكذا هههههههه , ده مش شكل واحدة عيد ميلادها انهارضة صح

عامة بالمناسبة ده انا هتكلم فى تلات حاجات ( شكر – اعتذار – امنية) معلش البوست ده ممكن يكون طويل

شوية , بس بفلوسى بقى وكمان مدونتى وانهارضة يوم ميلادى حاجة غريبة والله

شكر

لربنا ولامى و لكاريزما صحبتى اللى هى اكتر من اختى ولعمو اللى بيبيع فاكهة (علشان كان بيدعيلى كتير كل مقوله السلام عليكم وانا رحة الكلية) ولاى حد وثق فيه او احترمنى او قدرنى او عرفنى بجد , ومعتقدش ان الاخيرة فى منها حد

اعتذار

لاى حد زعلته او ضايقته او جرحته او ظلمته او غلطت فى حقه لانى اكيد مكنتش اقصد

لسمسمة صحبتى لانى زعلتها قبل كده بس خلاص على رايها بقينا صافى يا لبن حليب المراعى

لقلبى لانى بعدته عن ربنا فترة قبل كده وعلقته بناس تانية وفعلا صدقت ان محدش يستحق قلبى غير ربنا وبس

لصحابى وزميلاتى واى حد اتاخرت عليه فى معادى قبل كده لانى تقريبا عمرى محترمت مواعيدى وشكلى مش هتغير , اعذرونى بقى وخدوا على كده احسن ههههه

اعتذار لاى حد نسيت اعتذر له

أمنية عيد ميلادى

يلا يا بت يا انسانة غمضى عينيكى واتمنى امنية وبعدين فتحيها هتلاقى عكسها اتحقق علطول ههههه

ادينى غمضت عينى اهو اقول بقى (ومحدش يسالنى بتكتبى ازاى وانتى مغمضة عينيكى) مهارة بقى

انا نفسى , اممممممممم نفسى نفسى , ايييييييوة فى طبق زلابية , بتقول ايه الزلابية خلصت يا ساتر حتى الزلابية خلصت

لا بجد بقى عارفين انا نفسى فى ايه , بجد والله نفسى الناس كلها تحب بعضها و تخاف على بعضها

نفسى محدش يحسد او يحقد على حد , و محدش يتكلم وحش عن حد ومحدش يزعل او يضايق حد , نفسى محدش يجرح او يخون او يظلم او يالم حد مهما كان السبب ومهما اختلفت الطريقة

نفسى اللى بيحب حد ميجرحهوش واللى بيحترم حد ميهنهوش واللى بيعلم حد ميضربهوش واللى بيعاتب حد ميالمهوش

نفسى منعاملش حد بشكله او بلبسه او بمركزه , نعامل الناس بقلوبها وبس

نفسى اللى بيعمل حاجة يكون ادها , اللى بيحب يعرف يعنى ايه حب وان اللى بيحب مبيكرهش ومبيجرحش , اللى بيصاحب يعرف يعنى ايه صداقة وان اللى بيصاحب مبيخونش ومبيستندلش (صاعبة بس حاولوا تقروها) , اللى عايز يتجوز يعرف يعنى ايه جواز وان الجواز مش علاقة جسد وبس لا ده علاقة جسد وروح واعانة على طاعة ربنا , واللى عايز يشتغل يعرف ان رزقه بايد ربنا ..الخ

نفسى منكذبش على بعض ونكلم بصراحة ونفرق بين الصراحة والبجاحة بين الحب والاعجاب بين الطيبة والهبل بين الاحترام والتعقيد بين قله الاحترام والروشنة نفسى نسمى الاشياء باساميها

نفسى الناس كلها تحب ربنا بس محدش يحبه اكتر منى (مليش دعوة) لان ربنا جميل اوى وعظيم اوى ورحيم اوى

نفسى الناس كلها تبقى مبسوطة وفرحانة وراضية ومحدش يكون تعبان او زهقان او حيران او قرفان او مقهور او مظلوم او مجروح او مصدوم او حزين او ذليل او مهان او محتل ,والبلد تبقى فيها زرع اخضر وشجر وورد معرفش ازاى بس هو كده وخلاص والهواء يبقى نضيف والمياه مش ملوثة , اظاهر انا نفسى فى الجنة

كفاية كده لاحسن بعد كده هيجيلى حالة نفسية ولانى طولت عليكوا اوى عامة ده كانت امنية يوم ميلادى العامة اما الخاصة فاحب احتفظ بيها لنفسى واهمها ان ربنا يهدينى

رايحين فين تعالو هنا فين الهدية يا حبايبى , هو انا عماله اقول نفسى ونفسى واتكلم من الصبح علشان تمشوا كده , لا لازم اى حد يقرا الموضوع او حتى العنوان بس يقدملى هدية انه يدعيلى كده دعوة من قلبه وتكون فى الصميم ماشى ولو سمحتوا وبدون احراج محدش يسالنى على الجاتوه والحاجة الساقعة والكلام الفارغ ده , انتوا مش عارفين ان عيد الميلاد بدعة ولا ايه هههههه

مرة تانية كل سنة وانا طيبة وعقبال 595 سنة وانا بالصحة والسلامة

اسال الله ان يهدينى واياكم لما فيه الخير والصواب

اعوذ بالله ان اكون جسرا يعبر عليه الناس الى الجنة ويرمى به فى جهنم

واستودعكم الله الذى لا تضيع ودائعه

والسلام عليكم ورحمة الله وبركاته