رمضان كريم

بدرى بدرى بدرى والايام بتجرى والله لسه بدرى والله يا شهر الصيام

لا انا مش مسطولة ولا حاجة , انا عارفة ان رمضان لسه بيبدا وان دلوقتى بيقولوا اهو جه يا ولاد اهو جه يا ولاد وان ده اغنية اخر رمضان , انا بس حبيت اجيب من الاخر علشان ناخد بالنا , اصل كل رمضان نفضل نقول لسه تلاتين يوم لحد مييجى يوم 20 او 25 ونبدا نسمع الاغنية ده وتلاقى بقى اللى بيعيط لانه ضاع منه رمضان واللى بيبقى نفسه فى اسبوعين كمان علشان يلحق يعوض اللى ضيعه واللى مش لاحق يختم القران واللى مضايق لانه مش لحق يعمل خير واللى زعلان على صلاة التراويح واللى واللى , فانا قلت افكرنا باليوم ده علشان ميحصلناش كده

المهم بقى كل عام وانتم بخير بمناسبة شهر رمضان شهر الخير والرحمة والبركة والنور والهداية , بجد يا جماعة عايزين الشهر ده نعمل كل ما بوسعنا علشان نقرب من ربنا ونرضيه ونزود رصيد حسناتنا وننسف رصيد سيئاتنا , لازم نفوز بالكنز ده نطحن نفسنا شغل فى شهر رمضان , لازم نهجر سرايرنا , ونلزم مصاحفنا , افتكروا يا جماعة ان احنا ربنا كتبلنا اننا نبلغ رمضان وفى ناس كتييير ملحقوش الشهر ده واحنا محناش ضامنين اننا نعيش لرمضان الجاى (اعتبروا ان ده اخر رمضان نحضره) طيب وبعدين

نعمل ايه يعنى ؟

معرفش نعمل ايه نعمل كل حاجة كل حاجة منسبش اى حاجة ممكن تقربنا من ربنا , اى حاجة تتحط فى ميزان حسناتنا , اى حاجة تبقى رصيد لنا ناخد منه بعد رمضان ونمسح بيه ذنوبنا ومعاصينا (التى لا تعد ولا تحصى) , لازم نعمل كل حاجة كل حاجة , مفيش نوم , مفيش كسل و مفيش راحة , مفيش حيرة , مفيش تشتت , مفيش توهان , مفيش كذا حاجة عايزنها هى حاجة واحدة بس (رضا ربنا ) والحسنات , فلازم نفعلا ولا نفعل

هنفعل

هنختم القران باذن الله و بتدبر
هنصلى الفروض والسنن فى اوقاتها على اد منقدر
هنقول اذكار الصباح والمساء يوميا
هنصلى التراويح يوميا على اد منقدر ويا ريت يكون فى المسجد نساء ورجال
هنذكر ربنا كتير ونذكر غيرنا بذكره
هنصلى على النبى كتييير
هنبتسم فى وش كل الناس اللى بنتعامل معاها حتى لو كنا فى قمة الارهاق والتعب والجوع
هنقوم باعمال خير (مساعدة ايتام وزيارتهم - هنشارك فى شنط رمضان - هنكيس بلح ونوزعه على الناس ساعة الفطار واحنا راجعين من الكليات او المدارس او الشغل - هنمطى الاذى عن الطريق - هنساعد الناس فى الشوراع , نعدى الراجل العجوز , نشيل الحاجات مع الست المريضة - نصالح بين الناس اللى بتتخانق ......)
هندعى لبعض كتير , هندعى للمسلمين بالنصر والهداية والرحمة والمغفرة , هندعى لماما وبابا , هندعى لصحابنا , هندعى لفلسطين , هندعى للناس اللى بنحبهم , هندعى لكل النااااس اللى نعرفهم واللى منعرفهمش
هنبر باهلنا , امهاتنا وابائنا وقرايبنا ومش هنزعل حد فيهم ابدا طول شهر رمضان , مش هنكشر فى وش حد ومش هنعاند حد ومش هنضاق حد فيهم
هنبكى كتييييييييير لربنا فى صلاتنا ونكلمه ونشتكيله من حالنا ونطلب منه انه يسامحنا ويهدينا ويرضى عنا
هنتصدق علطول باللى نقدر عليه

مش هنفعل

مش هنكذب ومش هننم ومش هنتكلم وحش عن حد ومش هنتريق على حد ومش هنغتاب حد ومش هنجرح حد
مش هنتعصب ومش هنغضب ومش هنتنرفز على حد
مش هنام كتير ومش هندخل النت كتير ومش هنضيع وقت كتير
مش هنزهق ومش هنمل لان اللى بيحب حد مش يزهق من معاملته فاللى بيحب ربنا مش هيزهق من عبادته
مش هنسمع اغانى خالص ولا طبعا هنتفرج على كليبات ومش هنتفرج على مسلسلات كتير وهنتفرج على برامج دينية فى قناة الناس والحكمة واقرا والرسالة وغيرهم
مش هناكل كتير على الفطار علشان نعرف نقوم الليل بخشوع
مش هنشغل بالنا بالتفكير فى حد تانى غير ربنا على اد منقدر
مش هنزعل من حد ومش هنخاصم حد

بس خلاص ده اقل حاجة نقدر نعملها , اسيبكوا بقى تعيشوا مع رمضان ومع جمال رمضان (مش جمال مبارك ) وتعيشوا مع القران وتنطلقوا الى الخير والبركة والرحمة والمغفرة والتقرب الى الله وليكن شعارنا عجلت اليك ربى لترضى , وابقوا ادعولى ربنا يخليكوا

واذكركم واياى بالهدف الاسمى لشهر رمضان والعلة من فرضيته فى قوله تعالى (يَأَيّهَا الّذِينَ آمَنُواْ كُتِبَ عَلَيْكُمُ الصّيَامُ كَمَا كُتِبَ عَلَى الّذِينَ مِن قَبْلِكُمْ لَعَلّكُمْ تَتّقُونَ) , سورة: البقرة - الأية: 183

اه على فكرة

انا مجهزة موضوعات هانزلها برده خلال شهر رمضان وان شاء الله ربنا ينفعنا واياكم بها , بس هابتعد عن اى موضوعات غير دينية (فكرية او اجتماعية او انسانية عامة) اثناء شهر رمضان

اسال الله ان يتقبل منا ومنكم صالح الاعمال
وان يرزقنا الاخلاص فى القول والعمل

اعوذ بالله ان اكون جسرا يعبر عليه الناس الى الجنة ويرمى به فى جهنم

والسلام عليكم ورحمة الله وبركاته