ابتسامتك كنزك

فى ناس كتير بيكون كنزها اللى بتحاول تكسب بيه حب اللى حوليها موبايل او عربية او لبس او حتى لاب توب , كنز

مزيف لان مجرد انه يفقد الحاجة ده بيفقد حب الناس (الظاهرى طبعا) ليه , انا شايفة ان الكنز الحقيقى اللى تعرف

بيه تكسب حب الناس ليك هو ابتسامتك , الكنز الحقيقى اللى بيرقق القلوب ويصفى النفوس , فليه متكونش ابتسامتك

هى كنزك

ابتسامتك كنزك لما بتبقى مبسوط ومتكتفيش بنفسك وتبقى عايز تبسط كل اللى حواليك

ابتسامتك كنزك لما تكون فى بلاء او شدة ومتبقاش عايز تضايق حد معاك , ابتسامتك الراضية كنزك

ابتسامتك كنزك لما تتعامل مع بياع فى السوق او صاحب السوبر ماركت وتبتسم وانت بتطلب طلبك

ابتسامتك كنزك لما حد يغلط فى حقك او يظلمك وتبتسمله ابتسامة عتاب اللى منغير كلام بتحسسه بغلطه

ابتسامتك كنزك لما تحب حد ومتبقاش عارف تعبر له عن حبك غير بابتسامتك اللى هو بيفهمها افضل من مية كلمه حب

كنت هتقولها

ابتسامتك كنزك لما تدخل من باب شقتكوا وانت جاى من زحمة وحر وتعب وتبتسم لاهل بيتك

ابتسامتك كنزك لما تدخل على الجروب بتاعك وتلاقيهم قلبوها غم علشان الزمالك خسر الماتش فتبتسم وتقولهم يعنى

هما كانوا كسبوه امتى هههه (محدش يزعل انا زملكاوية اصلا)

ابتسامتك كنزك لما تبقى ماشى فى الشارع وتتكعبل فى طوبة وتقع على الارض وانت قايم تلاقى الناس بيبصولك

علشان يعرفوا رد فعلك وانت تفاجئهم بابتسامتك اللى تحول الموقف من موقف محرج لموقف لذيذ

ابتسامتك كنزك الذى لا يفنى الا بفنائك

ابتسامتك كنزك الذى يجلب لك السعادة والحب

ابتسامتك كنزك الذى تخطى به على المصاعب والمشاكل

ابتسامتك كنزك اللى مش بيكلفك غير تحريك كام عضلة من عضلات وجهك ( يعنى كمان تمارين رياضية ابسط يا عم)

خلى بالك

لا اقصد بالابتسامة الضحك ولكن مجرد الابتسامه يعنى مش هتتعب فى حاجة مش مهم ابتسامتك تكون جميلة وعندك

نغزتين يعنى , يكفينى انها تكون من القلب وبرضا وحب

افضل الابتسامة لما تكون عينك بتبتسم مع شفايفك

كان رسول الله صلى الله عليه وسلم بساما

اذاردت حب الناس فعليك ان تمتلك كنزا

انا كنزى الابتسامة وانت كنزك ايه؟

هو فى ربنا تانى غير اللى احنا بنعبده؟

انا عملت الفيلم ده لانى حسيت ان له رسالة لازم توصل للناس

انا الحمد لله دعيت ربنا كتير انه يوفقنى فى المشهد ده وحصل

هو نجاح الفيلم ده راجع لتوفيق ربنا اولا واخيرا ثم دعوات امى

الانسان مرتاح لانه عمل مشهد زى ده يتكتب فى تاريخه

كفاية جدا ان الواحد يموت والناس تفضل فاكراه بالاعمال ده

انا كل اللى عايزة أعرفه هو فى ربنا تانى غير اللى احنا بنعبده ولا ايه؟ يعنى مش هو ربنا واحد اللى أمرنا بالصلاة والصوم والزكاة والدعاء و... ونهانا عن الكذب والزنا والسرقة و.... , مش هو ربنا واحد اللى أمر النساء بالحجاب وأمر الرجال بغض البصر , مش هو ربنا واحد اللى أمى بتدعيله وتقوله يا رب اهدى أولادى واللى ام سلمى بتاعت اللبن بتقوله يا رب وسع فى رزقى واللى عم صلاح وهو بيفتح السوبر ماركت بيقوله اتكلنا عليك يا رب واللى الشيخ على بيبكيله بليل والناس نايمة ويقوله سامحنى يا رب لانى قصرت فى ذكرك ,هى الناس ده بتضحك علينا ولا على نفسها , يعنى ايه بندعى ربنا وهدفنا هو ربنا وربنا معانا وربنا يوفقنا وهى رقاصة بترقص فى كازينو وهى ممثلة عندها مشهد بتبكى فى حضن ممثل تانى وهو مخرج عامل فيلم عن خطر الارهاب وازمة الشباب كله عرى ولقطات مستفزة ملهاش لازمة ومشهدين تلاتة عن الارهاب والبطالة وهى مؤلفة بتتكلم فى المواضيع الساخنة اللى بيخجل الاخرين عن الحديث عنها (واللى بتفسد اخلاق الناس)..

هى ده الرسالة والهدف وهو ده توفيق ربنا , هو ليه الناس ده مش بتفرق بين توفيق ربنا وتوفيق الشيطان , ليه مش حاسين انهم غلط وان اعمالهم معظمها تافه وانهم بيفسدوا اكتر مبيصلحوا ده لو كانوا بيصلحوا حاجة اصلا , مشافوش محمد الدرة , مشافوش اية وهى بتضحى بنفسها علشان تحرر أرضها مشافوش غيرها وغيرها كتييير واقفين ادام المدافع وماسكين النبال , مشافوش الاباء اللى استشهدت والامهات اللى اترملت والابناء اللى اتيتمت والاطفال اللى اتشردت ولسه بيقولوا وااااااااااااأقصاه ؟

هما ليه مش بيفرقوا بين الحق والباطل بين الصح والغلط بين الخير والشر بين ربنا وبين الشيطان , والله معارفة اقولهم ايه لا حول ولا قوة الا بالله العلى العظيم:-

الممثلة بعد موتها تلاقى اعمالها بتتعرض على التلفزيون (رقص - ضحك – مايوهات – قبلات – مشاهد اغراء ....)

وبقولولك هى مماتتش هى باقية معانا باعمالها العظيمة المتميزة ,,,, اسال الله ان يرحم كل ميت مسلم

الممثل الفلانى ربنا يديله الصحة ويطول فى عمره لانه فعلا أفاد السينما المصرية وامدها بمشواره الفنى العظيم ,,,, واتفرج بقى على المشوار الفنى

احنا فعلا بنحمد ربنا وفخورين جدا بان الفبلم حاز على جائزة ( اوحمار) لانه بيناقش قضية هامة جدا وده شرف لينا

ادام العالم كله (واتفرج بقى على الفيلم تلاقيه مطلع الملتحين منحرفين والمصريين شاذين والبنات تافهين) وهو ده اللى بنقدم بيه نفسنا للعالم بره

انا كل اللى هقوله للناس ده قول الله سبحانه وتعالى :

(الّذِينَ اتّخَذُواْ دِينَهُمْ لَهْواً وَلَعِباً وَغَرّتْهُمُ الْحَيَاةُ الدّنْيَا فَالْيَوْمَ نَنسَاهُمْ كَمَا نَسُواْ لِقَآءَ يَوْمِهِمْ هَـَذَا وَمَا كَانُواْ بِآيَاتِنَا يَجْحَدُونَ) [سورة: الأعراف - الأية: 51]

(قُلْ هَلْ نُنَبّئُكُم بِالأخْسَرِينَ أَعْمَالاً, الّذِينَ ضَلّ سَعْيُهُمْ فِي الْحَيَاةِ الدّنْيَا وَهُمْ يَحْسَبُونَ أَنّهُمْ يُحْسِنُونَ صُنْعاً) [سورة: الكهف - الأية: 104]

وهذكرنى واذكركوا بقول الله سبحانه وتعالى :
(وَلاَ تُطِيعُوَاْ أَمْرَ الْمُسْرِفِينَ,الّذِينَ يُفْسِدُونَ فِي الأرْضِ وَلاَ يُصْلِحُونَ) [سورة: الشعراء - الأية: 152]


واسال الله ان يهدينى ويهديهم ويهدى المسلمين جميعا

والسلام عليكم ورحمة الله

بين قوسين

بين قوسين

بنسمع كلام كتير اوى طول ماحنا عايشين وبنكلم اكتر مبنسمع , بس مش كل الكلام زى بعضه ومش كله بنفضل فاكرينه فى كلام بيكون بين قوسين , كلام بنستعيده فى مواقف معينه فى حياتنا كلام له معنى فى وقت الكلام فيه بقى مجرد الفاظ فقدت معناها الحقيقى زى كلمه الحب , وانا بين قوسين دخلت الكلام ده:-

لو الحكومة مثلا قالت احنا هنحط على كتف كل مواطن عداد يعد الاذكار اللى هيقولها وكل ذكر عليه مقدار من المال هتعمل ايه

يااااااااه الواحد مش هيبطل ذكر , يا ساتر ده الواحد زبالة اوى يا عم علشان شوية فلوس ممكن نذكر ربنا طول اليوم وعلشان جنة عرضها السماوات والارض مكسلين نقول سبحان الله والحمد لله والله اكبر99 مرة ونختمهم بلا حول ولا قوة الا بالله بعد كل صلاة , سامحنا يا رب

هنفترض مثلا ان الحب فى قلبنا ربنا جعله مية وحدة , نقول مثلا 6 لماما وبابا واربعة للاخوات وهكذا للاصحاب والقرايب و... , هيبقى عندنا عدد كبير جدا من الوحدات مش عارفين نوديها فين وده اللى بيخلى الشباب يتجه للحب الشائع دلوقتى بين الولاد والبنات علشان يشغلوا الوحدات ده وعلشان ده ميحصلش لازم نشغل الوحدات ده فى حب ربنا والتقرب منه وحب رسوله

الكلام ده للاستاذ عمرو خالد وفعلا كلام عملى جدا

امانة ورجعت لصاحبها

ده جمله لواحدة صحبتى بعد وفاة جدتها وانا كنت بقولها ربنا يرحمها والكلام اللى انتوا عارفينه ده وفجاة قالتلى الجملة ده ياااااااااه اد ايه جملة مريحة لما الواحد يحس ان اللى مات ده امانة ورجعت لصاحبها , فعلا كلنا امانة هييجى يوم وهترجع لصاحبها

اللحظة اللى متحتاجش فيها ربنا متعبدهوش

اما ده بقى من كلام امى – ربنا يشفيها يا رب قولوا امين- قالتها لاحد اخواتى فى مرة وعلقت معايا اوى لان فعلا مفيش لحظة الواحد فيها ميبقاش محتاج ربنا يبقى مينفعش تيجى لحظة ميعبدش فيها ربنا ولا ايه؟

الوحشة تشوف نفسها فى المراية والحلوة تشوف نفسها فى عيون الناس

جملة قالهالى احد الشخصيات المحترمة ودخلت دماغى اوى بعد مفهمتها , مع انى بستغرب اوى ان برده فى بنات جميلة جدا وعلطول واقفين ادام المراية وبنات تانية مش حلوة اوى يعنى ومش بيقفوا كتير ادام المراية

انتى هتبقى حاجة كويسة اوى لما تكبرى

ده جملة قالهالى استاذ العربى بتاعى فى الثانوية العامة مش علشان انا كنت شاطرة ولا حاجة لا سمح الله لا يمكن علشان كنت محترمة حبتين , المهم يعنى انى علطول لما بحس انى فقدت حلم من احلامى او واجهت مشكلة معينة وحسيت بالياس و....كانت الجملة ده علطول تيجى فى بالى وتكون كوقود ليا , يمكن الاستاذ يكون نسى انه قالى الجملة ده ونسينى انا اصلا او مكنش يقصدها وهو بيقولها بس انا دخلتها بين قوسين , خلى بالكوا يا جماعة فى كلام كتير بنقوله لحد ممكن يحطه بين قوسين ويتاثر بيه سواء بالايجاب او السلب فيا ريت نخلى بالنا من ده ونكتر من الكلام اللى بياثر بالايجاب زى الشكر التشجيع النصيحة ونبعد عن اللى بياثر بالسلب زى الذم التحقير التسبيط(عكس التشجيع)

فتحت قوسا وادخلت به الكلمات
فانطلق قوسا فاحييت به من مات
وعجبى
(يسلام يا بت يا انسانة لما بتشعرى ولا المتنبى فى زمانه)

وانتوا عمركوا حطيتوا كلام بين قوسين؟

احرار ولكن ما هى الحرية؟

احرار

انا حر ارجع وقت مانا , عايز انا حرة البس اللى انا عايزاه , انا حر اسهر زى مانا عايز , انا حرة اخرج مع اللى انا عايزاه , انا حر اصاحب اللى انا عايزه ,انا حرة اعمل اللى انا عايزاه

ولكن

عمر الحرية مكانت (سجاير - فسح - اختلاط - عقوق - اغانى - سهر - عرى - سينما - شيشة...)وتقولى انا حر , ده انت فى قمة الذل واسوا انواع العبودية

ما هى الحرية؟

هو ده اللى هنعرفه فى المدونة ده , هنعرف الحرية الحقيقة اللى يمكن بنفتقدها احيانا بنحسها احيانا , بس الاكيد اننا لما بنحسها بنحسها بجد (فى طاعة ربنا - البعد عن الخطا على اد مبنقدر - فى وقفة نيل - فى قعدة الاصحاب - فى مساعدة محتاج - فى التعبير عن ارائنا - فى اى حاجة مش غلط بنبقى عايزين نعملها ونعملها بدون خوف) 0

طيب ليه المدونة ده اصلا؟

لقيتى مثلا ان المدونات الموجودة مش على المستوى المطلوب وانك لازم تتدخلى بنفسك لانقاذها0 ولا فاضية وزهقانة وقلتى تزهقينا معاكى ولا قلتى مثلا يا بت يا انسانة انتى اقل من المدونين دول فى ايه كل اللى بيمتلكوه كيبورد وعقل بيفكر وقلب بيحس وانتى كمان عندك التلاتة شغليهم مع بعض هتطلعى احسن الاكلات (اقصد الموضوعات)

فعلا

ممكن ده تكون من اسباب اتجاهى للتدوين بس السبب الحقيقى انى كتبت شوية موضوعات على ما اسهم كده وكنت ببعتها فى الميلات عندى وبنزلها فى منتدى رسالة وكده ,فقلت بدل مانا مزهقة الناس معايا وبفرض عليهم قراية كلامى اعمل مدونة واكتب فيها اللى انا عايزة اقوله واللى عايز يقرى يقرى واللى مش عايز يقرى برده

بس بس داخلة علينا تقوللنا احرار وامبابة ورمسيس , تعالى هنا قوللنا انتى مين اصلا علشان تدونى؟

انا انسانة (وكفى به تعريف) , بحب ربنا و الرسول ثم امى ثم اهلى ثم اصحابى ثم خانة فاضية ثم الناس كلهم ثم انا

بحب (الحرية - الحب - العدل - الصح - النور - الاطفال - الطبيعة)0

بحترم (نفسى - الاخرين - الصدق - الصراحة - العقلية المتفتحة )0

بكره ( الكذب - الخوف - الظلم - الضلمة - النكد - اللف والدوران - الرجالة ههههه - العقلية المحدودة - اسرائيل)0

اسال الله العظيم ان يرزقنا الاخلاص فى القول والعمل وان يجعل هذه المدونة فى ميزان حسناتنا والايجعلها فتنة لنا فى ديننا

اللهم لا تجعلنى جسرا يعبر عليه الناس الى الجنة ويرمى به فى جهنم

والسلام عليكم ورحمة الله وبركاته