غزة تستغيث ..... فأين التلبية

انا عايزة حد يرد عليه , الكهرباء انقطعت عن البلد فاهمين يعنى ايه تخيل انت ان النور انقطع فى بيتك ساعة واحدة , طيب تخيل بقى الشارع بتاعك كله كده , طيب تخيل بقى بلد كلها مقطوع عنها الكهرباء ومش يوم واحد , ولا حد عارف ينتقل من مكان لمكان ولا حد عارف يتعالج فى المستشفيات ولا عارفين يعملوا العيش حتى اللى ياكلوه يعنى مش عارفين يعيشوا افهموا بقى , يعالم فى بلد عربى مسلم بتموت , يعالم بلد عربى مسلم اهلها بلا طعام بلا علاج بلا حيااااااااااااة , فين جمعيات حقوق الانسان فين القوانين والمبادىء فين...... فين الانسانية

غزة تستغيث

انا بموت يا ناس , انا بموت يا عرب , انا بموت يا مسلمين , انا بموت يا شعوب , انا بموت يا بنى ادمين , انا ولادى بيموتوا فى مستشفياتى , انا لا عارفة ااكلهم ولا عارفة اعالجهم ولا عارفة احافظ عليهم , انا افرانى قفلت ومستشفياتى اتحولت مجازر وشوارعى بقيت ضَلمة وبيوتى بقيت مجاعات , انا فى كارثة , انا بنهار اغيثونىىىىىىىىىىىىى

العرب يستندلون كعادتهم

غزة تستغيث ونحن نرحب بالرئيس الامريكى فى بلادنا , غزة تستغيث ونحن نرقص مع الرئيس الامريكى فى بلادنا , غزة تستغيث ونحن لازلنا نفكر فى عمل حوارات ومؤتمرات وجلسات لمناقشة الموضَوع , غزة تستغيث ونحن نفكر اين نحتفل باعياد الميلاد واين نقيم المهرجانات , غزة تستغيث ونحن نبحث عن اغانى اليسا وافلام الجراة (المسمى الاخر للمسخرة) , غزة تستغيث ونحن جالسين على الانترنت نتصفح ما هو موجود لنقول فى النهاية (يااااااه تصدقوا غزة حالتها سيئُة اوى) , بس لازم نفوق بقى لازم نسال نفسنا وماذا بعد , لازم نعمل حاجة كفاية سلبية بقى

كفاية خوف وسكوت وذل ومهانة
قبل الاوان ميفوت يا امة غرقانة
تساوى ايه الحياة لما تضَيع الكرامة

وايه هنستناه بعد ألوف اليتامى

يا أمه دار الزمن وصبحتى منغير تمن

ولسه شايلة الكفن مستنيه النهاية

شعب غزة بيموت منغير دوا ولا قوت

والرد منا سكوت غزة هى البداية
كفاية ذل وعار يا امة المختار
زمن الدموع انتهى لبى ندى الاحرار
لو حتى منغير قوت هنادى باعلى صوت
نصرخ بكل ما فينا غزة مهيش هتموت

انا مش هوجه كلامى للرؤساء بتوعنا اللى كفاهم اثما انهم ضَيعوا من يعولوا لانهم اكيد مش هيسمعونى (صم بكم عمى فهم لا يعقلون) ...حسبى الله ونعم الوكيل

انا هخاطب نفسى ... هخاطبكوا انتوا

يجماعة انا عارفة ان مش بايدينا حاجة بس نعمل اللى نقدر عليه , نبطل تفاهة شوية , نخلى عندنا رسالة (لا يغير الله قوما حتى يغيروا ما بأنفسهم), لازم نفوق بقى لاننا علينا الدور
وبالنسبة لغزة ندعيلها كتير واحنا بنصلى وخاصة فى قيام الليل , نعينها معنويا ونحسسها اننا معاهم وحاسين بيهم من خلال الانترنت او الصحف او برامج التلفزيون , نقاطع , نخصص يوم معين نصومه وندعيلهم فيه , نشارك فى اى حاجة بتعبر عن اعترا ضَنا على اللى بيحصل ونصرخ باعلى صوت فى كل مكان ونقول كفاااااااااااية واعرفوا :

اذا الشعب يوما اراد الحياة فلابد للقدر أن يستجب

اللهم ارنا من قدرتك وعظيم سلطانك ما يدمر اليهود ويسحقهم

اللهم انى اسالك باسمك الاعظم الذى اذا دعيت به اجبت ان تفك الحصار عن غزة يا رب

الرضا

انا مش عارف ارضيهم ازاى

الواحد مهما يعمل برده محدش بيرضى

والله الواحد مبقاش عارف يعمل ايه علشان الناس ترضى عنه

كل ده جمل انا اول واحدة فيكوا كنت بقولها , والغريب انى كل ماكلم حد الاقيه بيشتكى من نفس المشكلة , تقريبا كلنا مبقناش عارفين نرضى كلنا , حد فاهم حاجة انا هفهمكوا , مثلا كل واحد فينا بيقول انه مش عارف يرضى الناس اللى حوليه (اسرته- صحابه- زمايله..) , امال مين اللى هو بيحاول يرضيهم دول اذا كان كل الناس بتشتكى من نفس

الموضوع , برده محدش فاهم حاجة

طيب انا هقولكوا مثال علشان تفهمونى , مثلا تلاقى فى التلفزيون كل متتفرج على برنامج (سياسى- ثقافى- اجتماعى...) تلاقى الضيف اللى هما مستضيفينه بيقول كلام ميه ميه , وعنده اقتراحات كتير اوى للاصلاح والقضاء على الفساد, وكل الناس بتكلم وتقول الاصلاح الاصلاح, انا قصدى ان كل الناس بتكلم كلام حلو اوى, وكله مع الاصلاح وضد الفساد , امال مين بقى اللى بيسبب الفساد ده لما كلنا تمام كده , يا رب تكونوا فهمتوا قصدى

كل واحد فينا بيقول انا حاولت ارضى الناس كلها ومحدش بيرضى , طيب انت مسالتش نفسك انت رضيت عن الناس كلها ولا لا , زى برده فى موضوع الخيانة مثلا , كلنا بنقول انا فلان وعلان خانونى وباعونى وانا كنت مخلص ليهم , محدش بيسال نفسه انا خنت مين وهو كان مخلص ليه , برده موضوع الرضا كده , احنا محدش بيرضى عننا لاننا مبنحاولش نرضى عن حد وعن نفسنا اولا

يمكن فعلا سعات مثلا الواحد يحاول يرضى اسرته بكل السبل بس بتيجى اوقات كده وتلاقى محدش راضى عنك وكلهم ضدك وكانك معملتش حاجة حلوة فى حياتك ابدا, او تحاول ترضى صحابك او زمايلك فى الشغل وبرضه محدش بيرضى وفى الاخر تتهم انك مقصر معاهم, وتحاول ترضى الناس اللى فى الشارع او اى مكان تروحه ولو بابتسامه منك ومحدش بيقدر ده منك

لكن الغريب ان بالرغم اننا بنبذل قصارى جهدنا علشان الناس ترضى عننا وفى الاخر محدش بيرضى , مبنحاولش اننا نرضى ربنا بالرغم انه الوحيد اللى بيرضى ومش اى رضا (من تقرب الى شبرا تقربت اليه ذراعا, ومن تقرب الى ذراعا تقربت اليه باعا ومن اتانى يمشى اتيته هرولة) لا وكمان يخلى الناس كلها ترضى عنك , سبحانك يا رب

انا شايفة ان فى حاجات لازم نعملها علشان ربنا يرضى عننا والناس كمان ونعرف نوصل للرضا اللى احنا عايزينه

1- ارضى عن نفسك اولا

2- ارضى عن كل الناس اللى حوليك وعاملهم برضا منك عليهم

3- خلى كل همك انك ترضى ربنا, واعرف انك مهما حاولت ترضى الناس مش هيرضوا لان ده طبيعة البشر , هما مش ملايكة ولا اله , اذا كان ربنا مع كل اللى بيدهولنا وبينعم بيه علينا مش بنشكره على نعمه ده ومش بنرضى , يبقى عايز الناس ترضى عنك انت يا عبد يا ضعيف, وانت كل اللى بتعمله ليهم لا حول لك ولا قوة فيه

4- علشان ربنا يرضى عنك وبالتالى الناس كمان , خلى فى نفسك ونيتك انك بتحاول ترضى الناس علشان ترضى ربنا بس , مش عايز اكتر من كده ومش عايز حاجة من حد سواء الناس قدروا ده او لا , انت مش عايز منهم حاجة ,انت عايز ربنا وبس " اليس الله بكاف عبده " وافتكر الحديث اللى بيقول فيما معناه (ان الله اذا احب عبدا ينادى جبريل فيقول انى احب فلان فاحبه فيحبه جبريل , فينادى جبريل فى اهل السماء ان الله يحب فلان فاحبوه , فيحبه اهل السماء , ثم يوضع له القبول فى الارض) وبكده تبقى انت نلت رضى ربنا عنك وكمان رضى الناس

واسال الله ان يرضى عنى وعنكم جميعا

اللهم انى اسالك رضاك والجنة واعوذ بك من سخطك والنار

واعوذ بالله ان اكون جسرا يعبر عليه الناس الى الجنة ويلقى به فى النار

سلسلة وجهة نظر

وجهة نظر 3

عارفة عارفة هتقولولى كنتى فين مكناش عارفين نعيش منغير وجهات نظرك (متواضعة صح) , علشان كده قلت الحقكوا بكام وجهة نظر كده على الماشى , بس صلوا على النبى الاول (عليه افضل الصلاة والسلام)0

يتقنعنى يقنعك

هات وخد كده يعنى , مش عارفة ليه المبدا ده مبقاش موجود دلوقتى , بقى كله يقنعك يقنعك , وتيجى تكلم واحد فى اى حاجة تحس انه بيملى عليك قراراته وماشى , مش ينفع يسمعك ولو تكرم وسمعك يبقى ودن من طين وودن من طين برده

يعنى مثلا لو اتنين بيتناقشوا , واحد يقولك انا شايف كذا والتانى شايف كذا , وفجاة تلاقى لا انت مش شايف كويس والتانى لا انت مبتشوفش اصلا , وقوم يلا يا حمار من هنا , وفى الاخر يمشوا وكل واحد متمسك برايه , مش عارفة ليه مع انه لازم يكون راى واحد فيهم صح , ولو الاتنين صح يبقى ليه منقولش (خلاص نطلع من الرايين براى وسط وبكده نبقى متفقين )0

وليه مبنقولش العبارات ده كتير فى حياتنا
لا عندك حق فى النقطة ده وباقى النقط هعيد تفكير فيها

ايوة انا كنت بفكر من زاوية تانية

ايوة صح انت رايك سليم
خلاص انا مقتنع برايك
شيك هاند

حساسة

لما تيجى تكلم واحدة وتقولها كلمة معينة تروح معيطة , أو واحدة واجهت موقف معين سخيف ادام زميلاتها أو ادام اى حد تلاقيها مضايقة جدا وزعلانة , ويقولولك أصلها حساسة اوى , برده الكلمة ده سعات بحس انها مش فى موضعها , مش معنى ان انا حساسة ان كل حاجة تزعلنى وان أى موقف يضايقنى وان الناس تبقى بتعاملنى بالورقة والقلم , انا ممكن اسمى ده ضعف او عدم ثقة بالنفس , اه الانسان الحساس ممكن يضايق او يتكسف او يتحرج بسرعة من موقف معين بس مش للدرجه دى يعنى

من الاخر كده انا شايفة ان الانسان الحساس ده الانسان اللى مبيحبش يجرح حد ولو

شاف حد فى ظرف سيئة او حد محتاج او حد فقير مثلا او شاف حد بيتعرض لموقف محرج , بيبقى مضايق اوى وزعلان ولو حساس اوى زى واحدة اعرفها كده! يحس ان هو السبب حتى لو هو ملوش دعوة باللى حصل , وممكن الموقف ده ياثر فيه جدا
يعنى بيضايق لغيره لانه حساس مش بيضايق لنفسه

الخوف

انواع كتيييييير , فى منها الكويس زى الخوف من النار او الخوف من ربنا , وفى منها الوحش زى الخوف من بكره والخوف من الناس والخوف من الغلط المسموح بيه , وده نوع منتشر جدا عندنا فى الكليات وخاصة عند البنات , تلاقى الواحدة خايفة لاحسن تكلم او تسال الدكتور عن حاجة وكانها لو سالته هياكلها , واحيانا لو المعيد طلب من واحدة انها تحل حاجة على السبورة تلاقى اجابات غريبة, والله تحس انها بتدل على الاعاقة زى مثلا انا عارفة الاجابة بس مش هعرف اقولها , طيب اشرحى اللى عارفاه وخلاص بأى طريقة , او مثلا انا مبعرفش اشرح , انا مبعرفش احل على السبورة , انا هقولك وحضرتك اشرح , او محدش هيسمعنى

ويسلام بقى لو الدوكتور سال سؤال تلاقى خمس تخمس اللى قاعدين عارفين الاجابة , بس خايفين يرفعوا ايديهم لاحسن الاجابة تطلع غلط , وتحس انك قاعد فى بيت الرعب مش محاضرة , وناس تقولك مهو الدكتور هيتريىء عليه والعيال هيضحكوا عليه, انا مش شايفة انها حاجة خطيرة يعنى لو حصل كده ده مش ينقص منك ده يدل على تفاهتهم هما وعادى يعنى ده نقاش لازم يكون فيه رد فعل

على فكرة انا ليا صحاب كتيييييييييير بحبهم جدا من النوع اللى بيخاف ده واختى الصغيرة كده برده , بس انا مبحبش الموضوع ده ونفسى يتغير

ملحوظة

ده مجرد وجهات نظر قد تكون صحيحة وقد تكون خاطئة وقد تكون لا صحيحة ولا خاطئة , وممكن تختلف من شخص لاخر

وجهات النظر دى لا تعنى ان انا البت الفتكة يعنى وخلاص بعمل بكل ده لا بس انا بحاول على اد مقدر اعمله وبطبقه فعلا

اللهم اجعلنى ممن يقولون القول فيتبعون احسنه ولا تجعلنى ممن يقولون ما لا يفعلون

والسلام عليكم ورحمة الله وبركاته

سلسلة وجهة نظر

وجهة نظر 2

الحب مش لازم ينتهى بالجواز , والجواز مش لازم يبتدى بالحب

يعنى ممكن تحبى واحد لانه فى حاجات كتير كويسة بس مثلا تلاقيه مش بيصلى , او بيصلى فرض ويسيب أربعة اهو ده مينفعش للجواز مثلا , وممكن تحب واحدة لانها محترمة ومتدينة وبنت ناس وكده بس لما تعرفها اكتر تلاقيها مبتعرفش تتعامل مع الناس او اى حاجة تانية والعكس مش لازم الجواز يبتدى بحب , بس لازم يبتدى بقبول متبادل بين الطرفين , يعنى لو واحد لقى واحدة فيها صفات كتير كويسة وتصلح لاقامة بيت مسلم سعيد ,فممكن الحب ييجى بعد كده من خلال عشرتهم وتصرفاتهم , بس برده ممكن الحب ينتهى بالجواز وممكن الجواز يبتدى بالحب..كل شىء ممكن

الكورة

سعات بسمع واحد بيقول لصاحبه يا عم انا مبحبش الكورة ومبتفرجش على ماتشات, وكأن ده حاجة يفخر بيها وانه كده مميز , هو اه ده حرية شخصية ولو واحد مبيحبهاش ده بمزاجه , بس انا شايفة انها مش حاجة مميزة يعنى انه ميحبش الكورة لان طبيعة الراجل انه يحب الكورة ويتابعها ويحب الرياضة عامة , وده مش بينقص منه ,بالعكس لو هو رياضى كمان فى تفكيره ومش متعصب ده شىء جميل

الرقة

صفة جميلة اوى , بس مش عارفة ليه حاسة انها بتستخدم فى غير موضعها, يعنى مثلا تلاقى واحدة مبتعرفش تروح السوق ولا تغسل فرخة ولا تقشر سمك, او واحدة بطيئة اوى أو مش مدردحة كده وفاهمة الدنيا كويس وبتعرف تتصرف , فيقولولك عليها اصلها رقيقة, ايه الرقة فى كده مش فاهمة, انا عن نفسى بسميها خيبة , سورى يعنى يا بنات بس انا فى رايى ان الرقة ده صفة ممكن يتسم بيها الراجل والست , ويبقى مفهومها رقة فى المشاعر والاحاسيس وكده

الحب من اول نظرة

مفيش حاجة اسمها حب من أول نظرة , اه ممكن يكون فى اعجاب من اول نظرة بس مش حب , لان حب ده معناه انك عرفت اللى ادامك كويس( اخلاقه - شخصيته - تفكيره - دينه - عيوبه ومميزاته و00) فحبيته بعد معرفته , لكن مفيش حاجة اسمها حب من اول نظرة بتاع الافلام ده , ولا بتاع اغنية بعتلى نظرة بعتله وانغام وكلام من ده , الحب اكبر من انه بييجى والا فتاكد انه برده ممكن اوى ينتهى بنظرة..ولا ايه

سلسلة وجهة نظر

وجهة نظر 1

انا فى تلات انواع من العواطف او بمعنى اصح تلات علاقات بستغرب منهم اوى وبيحتاجوا منى وقفة كتير اوى فى حياتى وكان ليه فيهم وجهة نظر حبيت اتكلم عنها

اولا علاقة الله بعباده : علاقة غريبة جدا جدا , خالق الاكوان ومالك الارض والسماوات الجبار الغنى بيحب عباده وبيهديهم وبيغفر لهم وبيعطيهم وبيودهم منغير مياخد منهم اى حاجة ومنغير ميحتاج منهم حاجة (لا فلوس ولا نساء ولا قرابين ولا...) حتى الصلاة والدعاء دول لينا احنا مش لله عز وجل وبيفيدونا احنا, لما بيأمر بدفع فلوس صدقة او تكفير ذنوب او غيره يامرنا نعطيها للفقراء والمساكين و... مش لربنا

حب ربنا لعباده موضع كان محيرنى جدا, يعنى سعات اقول طيب ليه يا ربنا تعمل معانا كده مهو لو غلطنا عذبنا فى جهنم وخلاص , ليه تغفر لنا وتتوب علينا وتدخلنا الجنة وترحمنا وتلطف بينا , وكان الرد اللى رديته على نفسى كما قال عز وجل لاحد المتسائلين برده فى هذا الشان (لو خلقتهم لرحمتهم) , فعلا لا اله الا الله

ثانيا علاقة الام بأولادها: بجد والله يمكن انا مش ام بس بستغرب جدا من الحب الشديد من الام لاولادها , لما بتجرى عليه لو وقع , ولما تفتحله حضنها لو رجع , ولما تشبع لو شبع , ولما ترضى لو رضى , ولما بتفرح لو فرح ولما بتحزن لو حزن , ولما بتغضب لو غضب

فعلا عاطفة غريبة , والغريب اكتر انه مهما يجحد او عصاها برده مبتكرهوش , ربنا يخليكى يا امى

ثالثا علاقة الزوجين: لما بيكونوا بيحبوا بعض طبعا , مش لما بيكون كل واحد مستنى للتانى على غلطة , ده مش بتبقى جوازة ده بتبقى(جنازة)ا

بس فعلا لما يبقى الزوج والزوجة بيحبوا بعض حتى لو واجهوا مشاكل كتير فى حياتهم , برده الحياة بينهم بتبقى جميلة جدا, وتحس انهم كيان واحد , وكل واحد بيحاول يسعد التانى

المهم انا كان ليا استنتاج كده من الموضوع ده , انه ممكن يكون السبب ان فى العلاقات التلاتة فى اختلاط بين الطرفين شديد جدا سواء

بالروح : لان ربنا نفخ فينا من روحه فاحنا من روح الله وعلشان كده ربنا كرمنا واعزنا وبيرحمنا

او بالدم: لان الابن ده كان جنين بيتغذى من دم امه فهو اصبح جزء منها لانه من دمها

او بالجسد : فالعلاقة الزوجية بين الزوج والزوجة اثناء الزواج بتجعل منهم شخص واحد , لان كل واحد فيهم بيصبح مراة للتانى (معنوية و ظاهرية وفكرية ومادية وكل حاجة )ا

ويمكن ده اللى مبيخليش علاقات تانية زى الصداقة والزمالة والجيرة والقرابة تكون لها نفس العظمة ده والسمو ده بالرغم من قوتها

ده رايى حبيت اتكلم عنه , قد يحتمل الصواب والخطا , قد يكون معروفا او مجهولا , قد يكون تافها او ذات قيمة , المهم اننا استنتجته بتفكيرى وعبرت عنه

المهم انتوا رايكوا ايه؟

وااااااااااااااأسفاه

اتأسفنا لكل الناس اللى غلطنا فى حقهم وعمرنا مفكرنا نتاسف لرب الناس اللى قصرنا فى حقه

احنا اسفين اوى يا ربنا , احنا قصرنا اوى فى حقك وعبادتك وطاعتك

احنا مخفناش منك فى معظم مواقف حياتنا لاننا مكناش حاسين انك بتراقبنا و لما عرفنا انك بتراقبنا جعلناك اهون الناظرين الينا

احنا اسفين اوى يا ربنا

احنا نسينا انك موجود واشتكينا لعبادك الضعفا اللى مش استحملوا شكوانا

احنا نسينا انك موجود ووقفنا على ابواب عبادك الضعفا اللى قفلوا الابواب فى وشنا

احنا نسينا انك موجود وكنا لما بنضايق من حاجة بنروح نبكى لعبادك الضعفا اللى استخفوا ببكائنا

احنا نسينا انك موجود وقعدنا نقول (احنا لينا مين فى الدنيا ده)0

احنا اسفين اوى يا ربنا

احنا قلنالك لا مش كافى لما قلتلنا "اليس الله بكاف عبده"0

احنا قلنالك لا مش جايين لما قلتلنا حى على الصلاة

احنا قلنالك هنصلى كمان ربع ساعة لما قلتلنا "ويل للمصلين الذين هم عن صلاتهم ساهون"0

احنا وحشين اوى يا ربنا , لا احنا مش وحشين احنا بنحبك اوى يا ربنا , بس احنا ضعفاء اوى , ومش عارفين نعمل ايه , احنا تعبنا اوى يا ربنا من الدنيا ده , لا احنا عارفين نعبدك حق عبادتك ولا احنا عايزين نعصيك , احنا سعات مبنبقاش عارفين احنا عايزين ايه , بس احنا عايزين نرضيك يا ربنا

وعايزين لما تقولنا " ويل للمصلين الذين هم عن صلاتهم ساهون " نقولك سلم يا رب سلم ونقوم نصلى علطول

ولما تقولنا "اليس الله بكاف عبده " نقولك بلى يا رب كاف عبده

ولما تقولنا حى على الصلاة نقولك لبيك يا رب

ولما تقولنا "الم يان للذين امنوا ان تخشع قلوبهم لذكر الله 00" نقولك قد ان يا رب , قد ان يا رب

استغفر الله العظيم رب العرش العظيم من كل ذنب واتوب اليه
اللهم ارزقنا قبل الموت توبة وعند الموت شهادة وبعد الموت جنة ونعيما
اللهم لا تمتنا الا وانت راض عنا
اللهم اجعلنا ممن يخشاك كانه يراك , ولا تجعلنا ممن جعل الله اهون الناظرين اليه

واعوذ بالله ان اكون جسرا يعبر عليه الناس الى الجنة ويرمى به فى جهنم
واستودعكم الله الذى لا تضيع ودائعه

من ورا ستارة الليالى

انا حبيت اكتب عن بعض الافكار فى ناس بيسموها خواطر وناس مبيسموهاش معرفش بقى , المهم انى قلت هكتبها يعنى هكتبها واللى مش عجبه ميقراش هههههههههههه

وقلت علشان معكننش على نفسى وعلى الناس اكتب عن الحاجات الحلوة اللى بتفرح والحاجات الوحشة اللى بتبكى بعدين

اولا :مواقف تفرح بجد وتخلى الواحد يقول الدنيا لسه بخير بالرغم من ندرتها , بس الواحد بقى بيحاول يتعلق باشاية , وزى مبيقولوا ( نشوف النص المليان من الكوب) بالرغم ان الكوب فضى ومبقاش فى نقطة مياه لا وكمان تقريبا انه اتكسر اصلا , بجد يا جماعة انا قررت انهارضه انى لن اتشائم ابدا , ولو الكوب اتكسر انا ممكن اشترى كوب تانى وامليه مياه ولو معييش فلوس اشترى كوب تانى , هصنع كوب من اول وجديد ولو مستحيل اصنع كوب هتخيل كوب واتخيل كمان انه مليان مياه

المهم بقى انا الاول هقولكوا حاجات بتخلينى انا خاصة ابقى مبسوطة لما بشوفها
لما تبقى ماشى فى الشارع وتلاقى واحد بيضحك مع واحد صحبه او( اى حاجة بقى) او واحدة مثلا بتهزر مع واحدة , وتحس ان الضحك طالع من قلبهم وانهم فعلا مبسوطين ومتلاقيش فى الضحك او الهزار تصنع او مجاملة او ضحكة صفرا , تحس انهم فعلا فرحانين من جواهم بقول

الدنيا لسه بخير

ولما تبقى ماشى فى الشارع وتلاقى واحد بيساعد واحدة عجوزة او اى حد بيساعد انسان محتاج حاجة ومش محتاج منه اى مصلحة او اى مقابل بقول

الدنيا لسه بخير

ولما تعدى جمب حضانة او مدرسة وتلاقى الاطفال عمالين يهزروا ويلعبوا (طبعا مبيبقوش عارفين ايه اللى مستخبلهم بعد كده ههههه) لا بجد وتلاقى البراءة فى عيونهم وصوت ضحكهم عالى بقول

الدنيا لسه بخير

وعامة انا مش هقول الحاجات اللى تخليك تقول هو فين الخير ده المرة ده , مرة تانية بقى ابقى اعكها براحتى , بس بجد يجماعة طول مفينا نفس لازم يبقى فينا امل واكيد بكره احسن ان شاء الله

ومسيرها تروق وتحلى

من ورا ستارة الليالى

شمس بكرة جايّة تاني

شمس بكرة جايّة جايّة

بكرة أجمل م النهارده

شُفت يوم عصفورة نونو

لسه طالعة من أودتها

ريشها كان مبلول و لونه

لون غناها و صوصوتها
قمت قُلت ف عقل بالي

بقى دي جناحها يشيلها؟

سِبتها و مشيت في حالي

بعد مدة قلت آجيلها
قالي واحد من جيرانها

ياه دي طارت ليها مدة

قلت معنى طيرانها

بكرة أجمل م النهارده

من ورا ستارة الليالي

شمس بكرة جايّة تاني

شمس بكرة جايّة جايّة

بكرة أجمل م النهارده

شُفت مرة مهرة سمرا

نونو ماسكة ف ديل مامتها

قُلت بكرة حتبقى حرة

تجري وحديها براحتها

عدى شهر و شهر تاني

شُفتها فرسة جميلة

تنطلق تجري ف ثواني

تقطع الرحلة الطويلة
قمت قلت لها قوليلي

ليه بتجري يا مهرة شاردة

قالت الريح بتناديلي

بكرة أجمل م النهارده

من ورا ستارة الليالي

شمس بكرة جايّة تاني

شمس بكرة جايّة جايّة

بكرة أجمل م النهارده

ملحوظة : انا اللى كاتبه الكلام اما القصيدة لا