لن يسبقنى الى الله احد

اولا : بهنيكوا بحلول شهر رمضان الكريم (كل سنة والامة الاسلامية كلها بخير وسلام وحب وامان وسعادة )ا

ثانيا : بهنى نفسى لان مدونتى بتتشرف بان ده يكون تانى رمضان يمر عليها وترحب بيه وتكلم عنه , زى مبيتشرف واحد عاصى عارف نفسه انه ولا حاجة بمرور ولى من اولياء الله الصالحين على بيته

وحشتنى اوى يا رمضان
.........................
مش عارفة اقول ايه , وحشنى كل حاجة فيك هدوءك وروحانياتك و جوك الايمانى الجميل , وحشنى لمة الناس فيك وصلة الرحم اللى الناس تكاد تكون مش بتفتكرها الا فى ايامك (الا من رحم ربى) وحشتنى المشاعر والصفات والاحاسيس الجميلة اللى الواحد بيحسها بتزيد عند الناس فى وجودك من كظم الغيظ والعفو عند المقدرة والمسامحة والطيبة والحنان والرضا والادب والحياء والتقى والنقاء وصفاء الروح والذهن والابتسامة الجميلة اللى بتترسم على وشوش الناس واعمال الخير والعطاء اللى بلا مقابل والحب اللى بحسه فى عيون الناس قبل كلامهم وحشنى الخشوع فى الصلاة والبكاء من خشية الله ودعوة الامام فى صلاة التراويح والتاميم وراه والدعوة ساعة الفطار , ياااااااااااه وحشنى كل حاجة فيك والله , يا ريت السنة كلها كانت رمضان

وكعادة الحبيب لحبيبه انه فى وجوده بيبقى عايز يعمله كل اللى يرضيه ويعرفه بحبه ليه واللى يكسب بيه حبه ورضاه وانه ميكونش زي اى حد لازم يتميز فى كل حاجة عشان ينول ثمار حبه وثواب رضاه

ومكنش فى احسن من شعار (لن يسبقنى الى الله احد) عشان يعبر عن الحماس والاصرار اللى المفروض يتحلى بيهم المحب (الصائم) فى الالتزام بكل ما يجعله احسن واحد فى نظر حبيبه (شهر رمضان)

فى العبادة
هصلى الفروض الخمسة فى وقتهم والسنن كلها
هصلى صلاة الضحى والتراويح يوميا
هقول اذكار الصباح والمساء يوميا
هذكر ربنا واستغفره طول اليوم
هدعى ساعة الفطار ووقت السحور وفى السجود وكل وقت ليا وللمسلمين جميعا
هبكى واخشع فى الصلاة ولو معرفتش هحاول اقرا واعرف ازاى اخشع وابكى فى صلاتى

فى الخير

هزيد من اعمال الخير والصدقات وشنط رمضان والمشاركة المادية والمعنوية للمحتاجين
بالاستراك مع اهلى او اصحابى او جيرانى او التطوع فى الجمعيات الخيرية كرسالة وصناع الحياة والجمعية الشرعية .. الخ

فى صلة الرحم

هبر امى واقاربى بالمساعدة والكلمة الطيبة والتهنئة والدعوة ليهم والحرص على عدم اغضاب اى منهم وارضاء الجميع ونشر روح الحب والمودة والتعاون والسعادة والمرح بينهم

ولن يسبقنى الى الله احد


توصيات رمضانية

يا ريت كل واحد فينا يخلى فى بينه وبين ربنا اسرار محدش يعرفها او يطلع عليها غير ربنا عز وجل (صدقة – صلاة – دعوة – عمل خير ) مثلا يتصدق بصدقة فى وقت مش فيه حد غير اللى اتصدق عليه بس او يقدم شنطة رمضان لمحتاج منغير محد يشوفه او يتوضا ويصلى ركعتين لله او حتى يبتسم فى وش الناس بغرض ادخال السرور عليهم ... وهكذا , نحاول يكون فى بينا وبين ربنا على الاقل تلات اسرار خلال الشهر الكريم بحيث وانت بتدعي ربنا تدعيه بالاسرار اللى بينك وبينه( باعمالك الصالحة) , زى الثلاثة الذين دخلوا الكهف واغلق عليهم وبدا كل واحد يفتكر عمل صالح كان بيحرك الصخرة لحد مالكهف اتفتح

انا عارفة ان من علامات تقبل صيام رمضان منك انك تطلع من رمضان احسن مدخلت يعنى تخرج بعبادة مكنتش بتعملها قبل رمضان او بصفات مكنتش موجودة فيك قبل رمضان او بقلب اطهر واصفى من حال قلبك قبل رمضان , عشان كده لازم كل واحد فينا يحرص انه يخرج من رمضان بعبادة (سنن مكنش بيصليها – قراءة ورد دائم من القران – حفظ للقران – ذكر .. ) وبصفات ( كظم غيظ – تفاؤل عفو عن الناس ... )ا

3) قبل رمضان يا ريت نسامح أى حد غلط فى حقنا ونطلب السماح من اى حد غلطنا فى حقه – نتوب توبة صادقة لربنا – نحاول نقطع علاقتنا باى حاجة ممكن تبعدنا عن ربنا فى رمضان – نحضر قلبنا للاغتراف من بحر الثواب



ان فى ناس كتير توفاها الله قبل شهر رمضان (اللهم ارحمهم جميعا) وان انت ربنا كتبلك تبلغه وده نعمة تستاهل الحمد وتستاهل انك تقدرها وتستفاد منها وفكر نفسك دايما ان محدش عارف اذا كان هيعيش لبلوغ رمضان القادم ولا لا

اسال الله ان يتقبل منى ومنكم صيام شهر رمضان

وكل عام وانتم بخير
رمضان كريم


اللهم لا تجعلنى ممن يقولون ما لا يفعلون واجعلنى ممن يقولون القول فيتبعون احسنه
واعوذ بالله ان اكون جسرا يعبر عليه الناس الى الجنة ويرمى به فى جهنم

كفاية بقى يا بابا

انا والله فكرت كتير اوى وكنت دايما بسال نفسى انت ليه بتعمل فيه انا واخواتى كده , قعدت سنين طويلة اسال وابحث واحاول افسر انت ليه بعت ابوتك بالسهولة دى ؟ قلت لنفسى وقالتلى ؟

معلش ضغوط وهموم وديون وبيت للغريب مرهون
واحنا مالنا مهو السبب فى الديون ده وهو اللى غرقنا فيها
اصله مش واخد باله مسئولياته كبيرة وكتيرة ومحدش حاسس بيه
مش اد المسئولية يسيبها لغيره ده مش ورث ده بيت وحرث
مهو مش بيدير البيت لوحده فى اكبر منه بينهبوه واصغر منه بيستغلوه
وهو ليه يسمح للى اكبر منه بنهبنا ويسيب اللى اصغر منه يسرق حقنا
بس مهما كان فاسد - انانى - حرامى - جبان برده طاعة ولى الامر لازمة وده امر ربنا
حتى لو كان ولى الامر فاسد او مش مننا حتى لو كان بيامرنا باللى يغضب ربنا

انا مش هعاتبك كتير انا بس عايزاك تشوف انت عملت ايه فينا وكمان فى امنا

اخوية الكبير مات
مات موتة ربنا
بس هو مات من القهر والظلم والاستبداد مات فى سبيل حرية المفروض انها من حقنا

اخوية التانى ضاع
ضاع وسط الهنا
لأ وسط الاغانى والفتن والتفاهات وجامع اتهد وكباريه اتبنى

واختى باعت جسمها
وانا مالى ده ملكها
اه ملكها بس ده عرضنا وشرف راح يوم مشديت بايدك حجابها اللى كان سترنا كلنا

واخوية الصغير ادفن
هو اللى باع مش انا
مهو باع عشان رغيف العيش (اللى حتى هو انعدم) باع اعضاؤه واشترى بيهم الكفن

ومش هكلمك عن اللى هج وساب البلد ولا اللى لحد دلوقتى فى المعتقل ولا اللى حلم وحلمه اتدبح
وتقولى بتنا هيتقدم بينا والخير هيملاه ويكفينا

وهو فين البيت مخلاص اتردم
وبقى ذكرى كلها جرح والم
ودموع ام مليانة حسرة وندم
ام كانت دايما حاضنة العلم
وقعت وسط ولادها واتصفى الدم
صرخ التاريخ لحظتها سقط العلم

كفاية بقى يا بابا

!! الموت

لا اصبروا مش تخافوا انا مش عزرائيل ولا انا جاية اقولكوا الموت ليس له مكان معين ولا زمن معين ولا سبب معين ولا جاية اقولكوا ان فلان ابن خالته مات وهو رايح رحلة مع صحابه ولا ان فلانة مامتها كانت صحتها كويسة جدا وكانت نازلة الشغل وفجاة ماتت ولا جاية اقولكوا ان فلان كان ادنا فى الكلية وكان بيمارس رياضة وصحته ممتازة وفجاة مات ولا ولا ولا مع ان ده عظات مفروض نتعظ بيها ونستفيد منه

بس صدقونى والله انا جيه اتكلم عن حاجة تانية خالص , انا عايزة اتكلم عن حب الموت ايوة عمرك كنت حابب انك تموت لا لا مش قصدى انك تموت (تنتحر) او انك تدعى على نفسك بالموت انا عارفة ان ده حرام انا بكلم عن الموت فى الوقت اللى ربنا كاتبه ليك , عمرك محسيت انك عايز تمشى من الدنيا ده , عمرك محسيت انك زهقان من الناس وزهقان من هنا ومن حر هنا ومن ذل هنا ومن فقر هنا ومن تعب هنا , عمرك محسيت انك عايز تروح هناك , مش اشتقت تشوف حبيبك النبى صلى الله عليه وسلم , يااااااااااااه مش اشتقت انه يحضنك ويطبب عليك , وتشتكيله وتبكيله وهو يمسح دمعك ويهون عليك , عمرك محسيت انك عايز تزوره و تشرب من ايده , طيب مش اشتقت لربنا مش اشتقت لرؤيته جل جلاله , مش عايز تروحله مش نفسك تتظلل بظله وتتنعم بجنته , مش عايز تاكل وتشرب وتستمتع وترتاااااااااح اه ترتاح من التعب والهم والحزن والخوف والظلم والمرض , ياااااااااه امتى بقى امتى الواحد يستريح من الدنيا ده ومن الناس اللى فيها ومن اللى شايفه ولو هو مش شايف وحش , يبقى امتى يستريح من اللى شايف الناس فيه

امتى بقى امتى نرجع بيتنا, اه بيتنا والله الواحد حاسس فعلا انه غريب هنا وان مش هى ده الحياة اللى هو عايزها , كل حاجة تعبانين فيها لمتعة عارفين نحصل عليها ولا طاعة عارفين نأديها ولا راى عارفين نعبر عنه ولا حب عارفين نحب ولا علم عارفين نتعلم ولا سلام عارفين نعمم ولا نصر عارفين نحقق ولا ولا ولا, وحتى لو عارفين نحقق حاجة بنتعب فيها اوى

طيب ايه اللى بيخلينا نخاف من الموت

انا شايفة ان اللى بيخافوا من الموت بيتقسوا لنوعين
الاول : فى ناس بتخاف من الموت لانها ماسكة فى الدنيا بايديها وسنانها عايزين متع ولذات وحياة رخيصة وفاكرين ان هى ده الدنيا وهى ده الحياة .. اسال الله الا يجعلنا منهم
والنوع التانى : خايفين من الموت لاحدى سببين او كليهما وهو انهم مش عايزين حد يحزن عليهم وانهم وده الاهم خايفين من لقاء ربنا عز وجل حتى لو كانوا من اولياء الله الصالحين بس برده خايفين من عذابه

وقفة

انا عايزة كل واحد فينا يسال نفسه هو بيخاف من الموت ؟ طيب ليه
.. لو للسبب الاول
يبقى لازم يراجع نفسه ويعرف انها على راى امى (دنيا ) يعنى من اسمها حاجة دنيا حاجة ملهاش لازمة وكده او كده هييجى يوم وهنسيبها
.. ولو كنت بتخاف من الموت للسبب الاخير
وهو الخوف من لقاء الله فلازم تعمل حساب اللقاء ده فى اى لحظة واللى عايز يمشى من هنا ويرحلهم هناك يبقى لازم يعمل اللى يليق بهناك واهل هناك وراحة هناك

اللهم احسن خاتمتنا جميعا
اللهم ارزقنا قبل الموت توبة وعند الموت شهادة وبعد الموت جنة ونعيما
اللهم لا تتوفنا الا وانت راض عنا

واسال الله ألا يجعلنى جسرا يعبر عليه الناس الى الجنة ويرمى به فى جهنم

استفهامات لا اجابة لها؟

ليه الواحد بيسكت فى الوقت اللى محتاج فيه انه يصرخ ويقول حاجة , فى الوقت اللى بيبقى عايز فيه يسمع كل الناس صوته ويقول انا خايف انا مظلوم او حتى انا بحب

ليه بنقول كلام كتير مش عارفين معناه لدرجة اننا مبقناش نفهم بعض , ليه الواحد ميقولش غير الكلام اللى هو عارفه وفاهمه وحاسس بيه وعايز يقوله وبس

ليه ملامحنا مبقتش بتعبر عن مشاعرنا , لما تبص فى وش واحد متعرفش اذا كان سعيد ولا حزين , مرتاح ولا مهموم , خايف ولا مطمن , ليه بردت ملامحنا وفقدت تعبيراتها

ليه الواحد بيحس بالخوف فى نفس الوقت اللى هو حاسس فيه بالامان يعنى سعيد لانه حاسس بالامان وحزين لانه

خايف ان الامان ده ميستمرش

ليه اختلفت معايير المعانى عندنا , اختلفت معايير النجاح معايير السعادة معايير الحب معايير الرجولة حتى معايير الجودة

ليه عقولنا بقيت مغلقة وقلوبنا بقيت مصمته وعيونا بقيت كفيفة وروحنا بقيت ثقيلة ونفوسنا بقيت مريضة واحلامنا بقيت بعيدة

ليه كل واحد فينا فاكر نفسه هو الصح وبقى يحكم على الكل انهم غلطانين منغير ميسمع منهم , والناس اتقسمت احزاب وفئات وجماعات وكل فرقة فاكرة نفسها منزلة من عند ربنا والفرق الباقية شياطين الارض والموضوع بقى عامل زى حلبة الصراع وكله عايز مصلحته

ليه الحاجات اللى بتبكى الواحد بقيت اكتر من اللى بتفرحه واللى بتجرحه اكتر من اللى بتداويه واللى بتخوفه اكتر من اللى بتطمنه

ليه كلمة الوداع بنسمعها اكتر من كلمة اللؤى والكلام الوحش بقى بيتقال بسهولة جدا والكلام الحلو بنقوله بصعوبة ده لو قلناه اصلا

ليه الغاية عندنا بقيت بتبرر الوسيلة ومبقاش نبل الغاية من نبل الوسيلة وبقى شعارنا هو (ان ليك عند ال..) و(انا عبد

المأمور) و(عيش ندل تبات مستور)ا)

ليه

اكتر استفهامتنا بقيت (ليه) اللى بتدل على السلبية مجرد الاعتراض وبس ومش (كيف) اللى بتدعو للايجابية وايجاد الحلول وتطبيقها

غزة تستغيث ..... فأين التلبية

انا عايزة حد يرد عليه , الكهرباء انقطعت عن البلد فاهمين يعنى ايه تخيل انت ان النور انقطع فى بيتك ساعة واحدة , طيب تخيل بقى الشارع بتاعك كله كده , طيب تخيل بقى بلد كلها مقطوع عنها الكهرباء ومش يوم واحد , ولا حد عارف ينتقل من مكان لمكان ولا حد عارف يتعالج فى المستشفيات ولا عارفين يعملوا العيش حتى اللى ياكلوه يعنى مش عارفين يعيشوا افهموا بقى , يعالم فى بلد عربى مسلم بتموت , يعالم بلد عربى مسلم اهلها بلا طعام بلا علاج بلا حيااااااااااااة , فين جمعيات حقوق الانسان فين القوانين والمبادىء فين...... فين الانسانية

غزة تستغيث

انا بموت يا ناس , انا بموت يا عرب , انا بموت يا مسلمين , انا بموت يا شعوب , انا بموت يا بنى ادمين , انا ولادى بيموتوا فى مستشفياتى , انا لا عارفة ااكلهم ولا عارفة اعالجهم ولا عارفة احافظ عليهم , انا افرانى قفلت ومستشفياتى اتحولت مجازر وشوارعى بقيت ضَلمة وبيوتى بقيت مجاعات , انا فى كارثة , انا بنهار اغيثونىىىىىىىىىىىىى

العرب يستندلون كعادتهم

غزة تستغيث ونحن نرحب بالرئيس الامريكى فى بلادنا , غزة تستغيث ونحن نرقص مع الرئيس الامريكى فى بلادنا , غزة تستغيث ونحن لازلنا نفكر فى عمل حوارات ومؤتمرات وجلسات لمناقشة الموضَوع , غزة تستغيث ونحن نفكر اين نحتفل باعياد الميلاد واين نقيم المهرجانات , غزة تستغيث ونحن نبحث عن اغانى اليسا وافلام الجراة (المسمى الاخر للمسخرة) , غزة تستغيث ونحن جالسين على الانترنت نتصفح ما هو موجود لنقول فى النهاية (يااااااه تصدقوا غزة حالتها سيئُة اوى) , بس لازم نفوق بقى لازم نسال نفسنا وماذا بعد , لازم نعمل حاجة كفاية سلبية بقى

كفاية خوف وسكوت وذل ومهانة
قبل الاوان ميفوت يا امة غرقانة
تساوى ايه الحياة لما تضَيع الكرامة

وايه هنستناه بعد ألوف اليتامى

يا أمه دار الزمن وصبحتى منغير تمن

ولسه شايلة الكفن مستنيه النهاية

شعب غزة بيموت منغير دوا ولا قوت

والرد منا سكوت غزة هى البداية
كفاية ذل وعار يا امة المختار
زمن الدموع انتهى لبى ندى الاحرار
لو حتى منغير قوت هنادى باعلى صوت
نصرخ بكل ما فينا غزة مهيش هتموت

انا مش هوجه كلامى للرؤساء بتوعنا اللى كفاهم اثما انهم ضَيعوا من يعولوا لانهم اكيد مش هيسمعونى (صم بكم عمى فهم لا يعقلون) ...حسبى الله ونعم الوكيل

انا هخاطب نفسى ... هخاطبكوا انتوا

يجماعة انا عارفة ان مش بايدينا حاجة بس نعمل اللى نقدر عليه , نبطل تفاهة شوية , نخلى عندنا رسالة (لا يغير الله قوما حتى يغيروا ما بأنفسهم), لازم نفوق بقى لاننا علينا الدور
وبالنسبة لغزة ندعيلها كتير واحنا بنصلى وخاصة فى قيام الليل , نعينها معنويا ونحسسها اننا معاهم وحاسين بيهم من خلال الانترنت او الصحف او برامج التلفزيون , نقاطع , نخصص يوم معين نصومه وندعيلهم فيه , نشارك فى اى حاجة بتعبر عن اعترا ضَنا على اللى بيحصل ونصرخ باعلى صوت فى كل مكان ونقول كفاااااااااااية واعرفوا :

اذا الشعب يوما اراد الحياة فلابد للقدر أن يستجب

اللهم ارنا من قدرتك وعظيم سلطانك ما يدمر اليهود ويسحقهم

اللهم انى اسالك باسمك الاعظم الذى اذا دعيت به اجبت ان تفك الحصار عن غزة يا رب

الرضا

انا مش عارف ارضيهم ازاى

الواحد مهما يعمل برده محدش بيرضى

والله الواحد مبقاش عارف يعمل ايه علشان الناس ترضى عنه

كل ده جمل انا اول واحدة فيكوا كنت بقولها , والغريب انى كل ماكلم حد الاقيه بيشتكى من نفس المشكلة , تقريبا كلنا مبقناش عارفين نرضى كلنا , حد فاهم حاجة انا هفهمكوا , مثلا كل واحد فينا بيقول انه مش عارف يرضى الناس اللى حوليه (اسرته- صحابه- زمايله..) , امال مين اللى هو بيحاول يرضيهم دول اذا كان كل الناس بتشتكى من نفس

الموضوع , برده محدش فاهم حاجة

طيب انا هقولكوا مثال علشان تفهمونى , مثلا تلاقى فى التلفزيون كل متتفرج على برنامج (سياسى- ثقافى- اجتماعى...) تلاقى الضيف اللى هما مستضيفينه بيقول كلام ميه ميه , وعنده اقتراحات كتير اوى للاصلاح والقضاء على الفساد, وكل الناس بتكلم وتقول الاصلاح الاصلاح, انا قصدى ان كل الناس بتكلم كلام حلو اوى, وكله مع الاصلاح وضد الفساد , امال مين بقى اللى بيسبب الفساد ده لما كلنا تمام كده , يا رب تكونوا فهمتوا قصدى

كل واحد فينا بيقول انا حاولت ارضى الناس كلها ومحدش بيرضى , طيب انت مسالتش نفسك انت رضيت عن الناس كلها ولا لا , زى برده فى موضوع الخيانة مثلا , كلنا بنقول انا فلان وعلان خانونى وباعونى وانا كنت مخلص ليهم , محدش بيسال نفسه انا خنت مين وهو كان مخلص ليه , برده موضوع الرضا كده , احنا محدش بيرضى عننا لاننا مبنحاولش نرضى عن حد وعن نفسنا اولا

يمكن فعلا سعات مثلا الواحد يحاول يرضى اسرته بكل السبل بس بتيجى اوقات كده وتلاقى محدش راضى عنك وكلهم ضدك وكانك معملتش حاجة حلوة فى حياتك ابدا, او تحاول ترضى صحابك او زمايلك فى الشغل وبرضه محدش بيرضى وفى الاخر تتهم انك مقصر معاهم, وتحاول ترضى الناس اللى فى الشارع او اى مكان تروحه ولو بابتسامه منك ومحدش بيقدر ده منك

لكن الغريب ان بالرغم اننا بنبذل قصارى جهدنا علشان الناس ترضى عننا وفى الاخر محدش بيرضى , مبنحاولش اننا نرضى ربنا بالرغم انه الوحيد اللى بيرضى ومش اى رضا (من تقرب الى شبرا تقربت اليه ذراعا, ومن تقرب الى ذراعا تقربت اليه باعا ومن اتانى يمشى اتيته هرولة) لا وكمان يخلى الناس كلها ترضى عنك , سبحانك يا رب

انا شايفة ان فى حاجات لازم نعملها علشان ربنا يرضى عننا والناس كمان ونعرف نوصل للرضا اللى احنا عايزينه

1- ارضى عن نفسك اولا

2- ارضى عن كل الناس اللى حوليك وعاملهم برضا منك عليهم

3- خلى كل همك انك ترضى ربنا, واعرف انك مهما حاولت ترضى الناس مش هيرضوا لان ده طبيعة البشر , هما مش ملايكة ولا اله , اذا كان ربنا مع كل اللى بيدهولنا وبينعم بيه علينا مش بنشكره على نعمه ده ومش بنرضى , يبقى عايز الناس ترضى عنك انت يا عبد يا ضعيف, وانت كل اللى بتعمله ليهم لا حول لك ولا قوة فيه

4- علشان ربنا يرضى عنك وبالتالى الناس كمان , خلى فى نفسك ونيتك انك بتحاول ترضى الناس علشان ترضى ربنا بس , مش عايز اكتر من كده ومش عايز حاجة من حد سواء الناس قدروا ده او لا , انت مش عايز منهم حاجة ,انت عايز ربنا وبس " اليس الله بكاف عبده " وافتكر الحديث اللى بيقول فيما معناه (ان الله اذا احب عبدا ينادى جبريل فيقول انى احب فلان فاحبه فيحبه جبريل , فينادى جبريل فى اهل السماء ان الله يحب فلان فاحبوه , فيحبه اهل السماء , ثم يوضع له القبول فى الارض) وبكده تبقى انت نلت رضى ربنا عنك وكمان رضى الناس

واسال الله ان يرضى عنى وعنكم جميعا

اللهم انى اسالك رضاك والجنة واعوذ بك من سخطك والنار

واعوذ بالله ان اكون جسرا يعبر عليه الناس الى الجنة ويلقى به فى النار

سلسلة وجهة نظر

وجهة نظر 3

عارفة عارفة هتقولولى كنتى فين مكناش عارفين نعيش منغير وجهات نظرك (متواضعة صح) , علشان كده قلت الحقكوا بكام وجهة نظر كده على الماشى , بس صلوا على النبى الاول (عليه افضل الصلاة والسلام)0

يتقنعنى يقنعك

هات وخد كده يعنى , مش عارفة ليه المبدا ده مبقاش موجود دلوقتى , بقى كله يقنعك يقنعك , وتيجى تكلم واحد فى اى حاجة تحس انه بيملى عليك قراراته وماشى , مش ينفع يسمعك ولو تكرم وسمعك يبقى ودن من طين وودن من طين برده

يعنى مثلا لو اتنين بيتناقشوا , واحد يقولك انا شايف كذا والتانى شايف كذا , وفجاة تلاقى لا انت مش شايف كويس والتانى لا انت مبتشوفش اصلا , وقوم يلا يا حمار من هنا , وفى الاخر يمشوا وكل واحد متمسك برايه , مش عارفة ليه مع انه لازم يكون راى واحد فيهم صح , ولو الاتنين صح يبقى ليه منقولش (خلاص نطلع من الرايين براى وسط وبكده نبقى متفقين )0

وليه مبنقولش العبارات ده كتير فى حياتنا
لا عندك حق فى النقطة ده وباقى النقط هعيد تفكير فيها

ايوة انا كنت بفكر من زاوية تانية

ايوة صح انت رايك سليم
خلاص انا مقتنع برايك
شيك هاند

حساسة

لما تيجى تكلم واحدة وتقولها كلمة معينة تروح معيطة , أو واحدة واجهت موقف معين سخيف ادام زميلاتها أو ادام اى حد تلاقيها مضايقة جدا وزعلانة , ويقولولك أصلها حساسة اوى , برده الكلمة ده سعات بحس انها مش فى موضعها , مش معنى ان انا حساسة ان كل حاجة تزعلنى وان أى موقف يضايقنى وان الناس تبقى بتعاملنى بالورقة والقلم , انا ممكن اسمى ده ضعف او عدم ثقة بالنفس , اه الانسان الحساس ممكن يضايق او يتكسف او يتحرج بسرعة من موقف معين بس مش للدرجه دى يعنى

من الاخر كده انا شايفة ان الانسان الحساس ده الانسان اللى مبيحبش يجرح حد ولو

شاف حد فى ظرف سيئة او حد محتاج او حد فقير مثلا او شاف حد بيتعرض لموقف محرج , بيبقى مضايق اوى وزعلان ولو حساس اوى زى واحدة اعرفها كده! يحس ان هو السبب حتى لو هو ملوش دعوة باللى حصل , وممكن الموقف ده ياثر فيه جدا
يعنى بيضايق لغيره لانه حساس مش بيضايق لنفسه

الخوف

انواع كتيييييير , فى منها الكويس زى الخوف من النار او الخوف من ربنا , وفى منها الوحش زى الخوف من بكره والخوف من الناس والخوف من الغلط المسموح بيه , وده نوع منتشر جدا عندنا فى الكليات وخاصة عند البنات , تلاقى الواحدة خايفة لاحسن تكلم او تسال الدكتور عن حاجة وكانها لو سالته هياكلها , واحيانا لو المعيد طلب من واحدة انها تحل حاجة على السبورة تلاقى اجابات غريبة, والله تحس انها بتدل على الاعاقة زى مثلا انا عارفة الاجابة بس مش هعرف اقولها , طيب اشرحى اللى عارفاه وخلاص بأى طريقة , او مثلا انا مبعرفش اشرح , انا مبعرفش احل على السبورة , انا هقولك وحضرتك اشرح , او محدش هيسمعنى

ويسلام بقى لو الدوكتور سال سؤال تلاقى خمس تخمس اللى قاعدين عارفين الاجابة , بس خايفين يرفعوا ايديهم لاحسن الاجابة تطلع غلط , وتحس انك قاعد فى بيت الرعب مش محاضرة , وناس تقولك مهو الدكتور هيتريىء عليه والعيال هيضحكوا عليه, انا مش شايفة انها حاجة خطيرة يعنى لو حصل كده ده مش ينقص منك ده يدل على تفاهتهم هما وعادى يعنى ده نقاش لازم يكون فيه رد فعل

على فكرة انا ليا صحاب كتيييييييييير بحبهم جدا من النوع اللى بيخاف ده واختى الصغيرة كده برده , بس انا مبحبش الموضوع ده ونفسى يتغير

ملحوظة

ده مجرد وجهات نظر قد تكون صحيحة وقد تكون خاطئة وقد تكون لا صحيحة ولا خاطئة , وممكن تختلف من شخص لاخر

وجهات النظر دى لا تعنى ان انا البت الفتكة يعنى وخلاص بعمل بكل ده لا بس انا بحاول على اد مقدر اعمله وبطبقه فعلا

اللهم اجعلنى ممن يقولون القول فيتبعون احسنه ولا تجعلنى ممن يقولون ما لا يفعلون

والسلام عليكم ورحمة الله وبركاته